Thlipui na tak, Tropical Storm Nate thawk avangin Costa Rica, Nicaragua leh Honduras-ah mi 22 an thi tawh a, he thlipui hian US lam a pan mek a ni. He thlipuiin chhiatna a thlen avang hian Central America-a ram hrang hrangin emergency an puang tawh a, ruah a sur nasat avangin lei a min bakah tui a lian a, thil eng emaw zat a chhia a, mi 20 vel chin hriat lohin an awm a ni. Costa Rica ramah chuan mi 8 an thi a, mi 4,00,000 velin harsatna nasa tak an tawk a, awmna tur nei lo pawh an tam hle bawk. Honduras-ah chuan mi 3 an thi a, Nicaragua-ah mi 11 an thi bawk a ni. US-a thlipui chanchin zirna hmunpui, National Hurricane Centre chuan thlipui hian US a pan mek niin an sawi a, khaw chin zirmite chuan thlipui hi a na telh telh dawn nia sawiin, US chhim lam vaukam a thlen hunah chuan Hurricane puitlingah a insiam dawn niin an sawi a ni.
Germany-ah pawh thlipui tleh nasa avangin mi 7 an thi a, thuneitute chuan thli hi darkar khata km 120 vela chaka a tleh niin an sawi a, thlawhna bakah rel leh lirthei dangte pawh chawlhtir vek an nih thu an sawi a, thi zinga pahnih chu thingkung tluin an chuanna motor a delh avanga thi niin an sawi bawk. Khaw chin zir mite chuan thlipui hian Poland ram a thlen thuai an ring a ni.
