Human Resource Development Minister, Pu Prakash Javadekar-a’n Mizoram University Vice Chancellor nghet tur chu dah fel thuai a nih tur thu, nimin khan Lok Sabha member, Pu CL Ruala leh MSU hruaitute a hrilh. Pu CL Ruala leh MSU hruaitute hian Union Minister hi nimin tlai khan New Delhi-a Shastri Bhavan-a a pisaah an hmu a, MZU Vice Chancellor nghet dah thuai tura an ngenna chu chhangin Pu Javadekar chuan, Vice Chancellor tur thlanna file chu tunah hian President pawmpui tura thawn tawh a ni tih sawiin, President-in a pawm veleh Vice Chancellor tur chu tihfel a ni mai dawn niin a sawi. Mizoram mamawh an thlen dang, Lungleia MZU Campus hawn ngenna chungchang pawh Minister chuan lo en zui a tum thu a sawi a, CSS hnuaia Hindi zirtirtu dah leh chungchang pawh a rang thei ang bera chin fel tum a ni tih sawiin, Mizo \halaiten Hindi zir an duh chu lawmawm a tih thu leh, sorkar laipuiin sum a sen thlawn loh nan Hindi chu thiam tuma zir a \ul thu a sawi. Lok Sabha member, Pu CL Ruala leh MSU hruaituten HRD Minister hnena Mizoram mamawh an thlen hi ziakin an thehlut a, MSU hruaitute hi an President, RB Lalmalsawma’n a hova, an zingah hian an hruaitu dangte bakah Lunglei Regional Hqrs. President, Biaksiamtluanga pawh a tel a ni.
