US Las Vegas concert chhimtute mi pakhatin silaiin bei, mi 50 chuang thi

United States, Nevada state-a Las Vegas khawpuia concert buatsaihnaah mi pakhatin silaiin mi a pawng kah a, mi 50 chuang an thi a, mi dang 100 chuang an hliam. He thil hi America ram sanaa nizan zanlai pelh hnua thleng nia sawi a ni a, Las Vegas khawpuiah hian country music k<tpui-ah concert buatsaih a ni a, police-te chuan silai hmet puaktu hian a bula hotel pakhat, Mandalay Bay a\angin concert chhimtute chu a kap niin an sawi. Amah hi tualchhung mi nia an hriat thu sawiin, an kap hlum nghal tih an sawi bawk. Sheriff Joe Lombardo-a chuan pawi khawihtu hian thurualpui a neih an rin loh thu leh, amaherawhchu a zin veivahpui, hmeichhe pakhat, khawchhak lam hmelpu, Marilou Danely-i chu an zawng mek niin a sawi a, thi leh hliam zat chu chiang taka sawi theih a la ni lo tih sawiin, hliam zinga mi 14 chu an ngaihtuahawm hle niin a sawi bawk. He pawi khawihna avang hian police-te chuan helai hmun leh a chhehvel hi civil mite kal tlang theih lohin an siam nghal a, Nevada hi US-a state zingah chuan silai leh ralthuam lei, kawl leh hralhna kawnga zalen berte zingah a tel a, state mipuite chu khawlaia silai ken phalsak an nih bakah, silai nei tur hian sorkarah phalna lak hmasak a ngai lova, an duh chuan midang hnenah pawh an hralh chhawng thei bawk a ni.