US President Donald Trump a’n Singapore-a an inbiakna a kaltluang anih chuan North Korea hruaitu Kim Jong-un chu White House tlawh turin a sawm mai thei tih a sawi

US President Donald Trump a’n Singapore-a an inbiakna a kaltluang anih chuan North Korea hruaitu Kim Jong-un chu White House tlawh turin a sawm mai thei tih a sawi. Tun thla ni 12-a Kim Jong-un nen an inbiak tur chungchang Japan Prime Minister Shinzo Abe nen an sawidun hnuah he thu hi a sawi a, Korean ram pahnih indona mumal taka tihtawpa inremna tluantling siam theih a beiseiawm tih a sawi a, hei erawh hi chu an sawidun tura chhawp chhuah zinga a awlai ber a ni tih a sawi tel thung a, hemi chungchang an sawi zawh hnua an sawi dun leh tura chhawp chhuah chu a pawimawh hle dawn tih a sawi. US leh a thawhpuite chuan North Korea in nuclear ralthuam tihchangtlun bansantir hi an duh a, hei erawh vawi khat inbiakna-a chinfel nghal vek theih a nih a rin loh thu Trump-a chuan sawiin, hun rei deuh zawk a duh dawn a ni a ti. US Secretary of State Mike Pompeo chuan amah Kim Jong-un a’n nuclear ralthuam tih tawp a duh thu a sawi chiang tawh a ni a ti bawk.