State 7 leh union territory 1-a bial 59-ah Pathianni khian vote thlak a ni dawn a, Thawhlehni-a Kolkata-a buaina thleng vangin West Bengal-a campaign theih hun chu nizan khan tihtawp a lo ni tawh a ni.
PM Modi chuan Madhya Pradesh-a Khargone-ah vantlang inkhawm a huaihawt a, Congress President Rahul Gandhi chuan Himachal Pradesh-a Solan-ah vantlang inkhawm a huaihawt a, Congress General Secretary Priyanka Gandhi
Vadra chuan Uttar Pradesh-a Mirzapur leh Kushinagar-ah roadshow a huaihawt a, BSP hotu Mayawati chuan Mirzapur-ah vantlang inkhawm a huaihawt bawk a ni.
BJP President Amit Shah-a chuan vote thlak tawh chinah BJP party chuan seat 300 chuang a hmuh tawh a rin thu a sawi a, PM Modi chuan Congress chu inthlan zawh hma, vote pawh chhiar hmain PM post chelh pha lo tura inngaiin an tlawm tawh a ti a ni.
BJP chuan Mamata Banerjee chu Amit Shah tihhmingchiat tuma Kolkata-a buaina chhuaka Ishwar Chandra Vidysagar-a lim suasamah an puh a, PM Modi chuan mipuite chu helai hmunah vek hian Vidyasagar-a lim ropui tak din a tiam a, hemi chungchangah hian Mamata chuan BJP party-in lim an lo tih chhiat tawh zawng zawng a puang chhuak thung a, Vidyasagar-a kha Bengal tan mi pawimawh tak a nih avangin a party chuan a ngaihlu a, a lim an tih chhiat chhan tur a awm lo a ni a ti.
Maharashtra Congress NCP candidate Anand Paranjpe chuan a birthday lawmin, a birthday cake-ah hian “Ram venghimtu hi rukru a ni” tih a chuang a ni.
