Zirtirtu tran lote March ni 31, 2019 hmaa train vek turin School Education Department-in hriattir

0
1125
views

Right to Education Act-in a phut angin zirtirtu, train lote chu kum 2019, March ni 31 hmaa train vek tura hriattir an ni. School Education Department hotute hnen atanga Zonet thu dawn danin, RTE Act hi kum 2010 atang khan ram pumah hman a ni a, RTE-in inkaihhruaina dan a siam zingah zirtirtu, train lote chu kum 3 chhunga training nei fel hman vek tura tih an ni a, hemi hun chhung hian train hman lo an tam avangin kum 2015 thleng pawhsei a ni a, heti chung hian zirtirtu train lo an la awm fo avangin sorkar laipui chuan tun hnai khan hriattirna khauh zawk tichhuakin, zirtirtute chu kum 2019, March ni 31 hmaa train vek tura tih an ni a, hemi hnua la train lo fote chuan zirtir hna an thawk chhunzawm thei dawn tawh lo a ni. School Education Department hotute chuan, Mizoramah tun thleng hian RTE-in a huam chin, sorkar enkawl Primary leh Middle School-ah zirtirtu la train lo mi 700 vel an awm niin an sawi a. Tun hnaia sorkar laipuiin hriattirna a tihchhuah tharah sorkar enkawl chauh ni lo, mimal, kohhran leh pawl enkawl zirna ina zirtirtute pawh an train vek a ngai tawh dawn a, tunah hian Mizoram puma mimal, kohhran leh pawl enkawl zirna inah zirtirtu 6,292 an awm a, chung zinga 636 chu train tawh an ni a, la train lo mi 5,654 an la awm niin an sawi. Education Department hotute chuan, zirtirtu train lo an la tam avang leh, heng mite hian hun tiam chhunga an train vek theih nan sorkar laipui ruahmannain tunah hian National Institute of Open School (NIOS)-ah zirtirtu Training Course hawn mek a nih thu leh, train lo tan zirtir hna a thawh chhunzawm theih dawn loh avangin ngai pawimawh se an duh thu an sawi.