Zoram Thar Pawl-in Rorel Palai Inkhawmpui hmang

0
649
views

Zoram Thar Pawl chuan nimin khan Aizawl Chanmari YMA Hall-ah Rorel Palai Inkhawmpui an nei a, hetah hian kumina Mizoram Assembly inthlanna neih tur hmachhawn dan tur chungchang an sawiho. An hmalakna tur zingah chuan Mizoram chhunga khawpui hrang hranga veng hrang hrangah leh thingtlang khaw hrang hranga Zoram Thar tawngtai khawl din dan tur chungchangte, Israel ram Independence kum 70 tlin champha lawmna neih tura palai intirh ve dan tur te a tel a ni. Nimin chawhma lama an rorel inkhawmah Synod Revival Speaker, C. Lalnunsanga chuan Pathian thu sawiin, Revival Speaker te rawngbawlna leh Zoram Thar thil tum chu thil thuhmun a ni tih a tarlang a, Mizoramin rorelnaa Bible lek chhuak ngam hruaitu a mamawh niin a sawi bawk. He inkhawmah hian Pu Zaichhawna Hlawndo chuan thusawiin kum 2018-a Mizoram Assembly inthlanna neih turah Pathian tihtute chauh an ni tawh dawn niin a sawi a, Zoram Thar Pawl chuan Assembly bial tinah Lal Isua tan bawm a hung dawn niin a sawi a ni. Pu Zaichhawna Hlawndo chuan he inthlannaah hian Pathianin Mizoram tichhetu ber Party Politics chu a nuai bo tawh dawn a, beram huang thar Lalpan Mizote a pe tawh dawn niin a sawi a ni. He Zoram Thar Rorel Palai Inkhawmpuiah hian Zoram Thar puipa turte thlan nghal a ni a, chungte chu Pu Zaichhawna Hlawndo, Pu R. Vanlalzauva, Pu K. Lalnghinglova, Prof. Lalramnghinglova, Pu R. Lalchhuanmawia, Pu Zosangliana, Pu Lalremsanga leh Pu Zodinthara te an ni.