Vawiin session-ah “Zu leh ruihhlo hluar ta lutukin Kohhran, khawtlang, chhungkua leh mimalah harsatna leh buaina nasa tak min thlen avangin kan harsatna sukiang tur hian theihtawp chhuah ni rawh se” tih chu House-a sawiho a nih hnuah lungrual taka pass a ni. Resolution hi Opposition Group Leader, Pu Vanlalzawma putluh a ni a, sawihonaah hian rorel lai pawl leh Opposition member mi 14-in thu an sawi a, an zingah chuan Chief Minister leh Minister dang pahnih, Pu Lalsawta leh Pu PC Lalthanliana te pawh an tel a ni. Member tin deuhthawin indem leh mawhpuh tur zawng lova ruihhlo avang leh zu avanga mimal, chhungkua leh khawtlang bakah ramin a tuar dan leh a chhiat phah dan te, he buaina leh harsatna sukiang tura theihtawp chhuah a \ul thu an sawi a, member \henkhat chuan mitthi pun dan te, thi zingah hmeichhia aia mipa an tam dan te zu leh ruihhlovin natna \ha lo HIV/AIDS leh sualna chi hrang hrang a tihpun dan te, kum reilote hnuah Mizo hnam a ral mai an hlauh thu te an sawi a, a do tura sorkar bakah YMA leh tlawmngai pawl dangte, Kohhran, khawtlang \an lak dan te tarlangin enkawl ngaite enkawl nan Home hrang hrang \anpuina tam zawk pek \ul an tih thu te an sawi a ni. Opposition member thusawitu \henkhat chuan MLPC Act 2014 hman mek hi hmang tawh lova tihtawp an rawt a ni. Hetihlai hian rorellai pawl member \henkhat chuan zu duh loh vangin tun hma khan a khapna dan MLTP Act hmanga khap a ni a, mahse a hlawhtlin loh avangin tunah hian a \ha ber tura rin MLPC Act hman leh ta niin an sawi bawk. He resolution sawihonaah hian House Leader, Pu Lal Thanhawla pawhin thu a sawi a, Mizoram hi Golden triangle a\anga ruihhlo tawlhruk kalkawnga awm a nih avangin ruihhlovin Mizoram a chiahpiah thu te, ruihhlovin harsatna tam tak a thlen avang tun hmalam a\anga sorkarin \an a lo lak tawh dan te, Central YMA hnuaia ruihhlo dotuten ruihhlo zuartu leh an ruihhlo pawh man sak te hrem loha chhuah leh \hin an nih avanga an lungawiloh thu te, hrem ngei an nih theihna tura Judicial Magistrate te pawh \an la tura ngen an lo nih tawh thu te a sawi a, ruihhlo do tur hian \anrual a \ul thu leh theihtawp chhuah a \ul thu te, theihtawp chhuaha hmalak dan tur pawh inhmukhawma a huhova rel a la \ul dawn nia a hriat thu te a sawi a ni. Resolution pass hma lawka a tlangkawmna thu sawiin a puluttu Pu Vanlalzawma chuan Resolution putluh ngaihdan thu hmuna sawiho leh pass member ten an duh chu lawmawm a tih thu sawiin zu leh ruihhlo \hat lohzia naupang zirlaibua telh te, ruihhlo ngaite chhanchhuah nana \anrual \ul a tih thu leh Pathian kohnaa ngaia hlawh beisei lova hnathawktute \anpuina pek tam \ul a tih thu te, lungrual taka \ang tlanga Resolution tipuitling tura theihtawp chhuah zui a \ul dawn thu te a sawi a ni. He Resolution pass hnu vawiin tlai dar 4:12 khan Speaker, Pu Hiphei chuan vawiin atan Session a titawp a, Thawh\anniah a hun pangngaia inhmukhawm leh turin member te a \in tir a ni. Tun thla ni 26, Thawh\annia Session chhunzawm a nih leh hun chuan tihdan pangngaiin hun hmasaah zawhna leh chhanna lak a ni ang a, hemi hnu hian Minister pahnih, Pu Lalsawta leh Pu John Rotluangliana te hna chanpual, kum 2018-2019 chhunga enkawlna tur sum ruahman sawihova pass tum a ni ang.
