46th Assam Rifles chuan vawiin khan AR Loch House-ah NGOs Conclave, 2018 an buatsaih a, an Commandant, Col. Pratyush chuan, Assam Rifles-in Mizo mipuite tan nasa zawka hnathawh an tum thu leh, tlawmngai pawlte nen inpawh zawka thawhho an duh thu a sawi a, kum 20 kal taa Zokhawsanga sipaite awmna tur ruahman a nih khan inremnaah Mizoram sorkar tih ve tur engemawzat a awm a, kawlphetha pek te, kawng siamte leh tui pek te a tel a, tun thlenga tihhlawhtlin loh a la awm nual avangin sipaiten Aizawl a hmun laili an la luah reng niin a sawi. Col. Pratyush chuan an sipai zingah \awng lama harsatna nei an tam tih a sawi a, anni ho zirtir nana \awng zirna an buatsaih, Language class chu pawn lam mite tan chhim ve theih a nih tur thu sawiin Sports Association hrang hrang thawhpui zel an duh thu leh sipaiah pawh Footballer 30 chuang leh, Taekwondo leh Karate player engemawzat lak an ni tawh niin a sawi bawk.
Central YMA President, Pu Vanlalruata pawhin thusawiin sipaite leh Mizo mipuiten thawhhona \ha zawk am neih a pawimawh hle tih a sawi a, thingtlang hmun kilkhawra chengte tana kawng hawn sak te, an hriselna leh zirna lam hmasawnna tur ngaihtuah sak kawngah sipaiten tha an thawh theih thu sawiin, Mizo \halai tam tak, hmun danga kal chhuak tur, \awng thiam si lote zirtir kawngah pawh Assam Rifles te an \angkai theih tur thu a sawi bawk.
He NGO Conclave ah hian Central YMA, MFA leh MZP aiawhte an tel a ni. Assam Rifles hi kum 180 a ni tawh a, khawvela paramilitary force upa ber a ni a, Aizawla awm, 46th Assam Rifles hi AR zingah chuan a naupang ber, kum 12 chauh a la ni thung a ni.
(Rsa)
