Sorkar laipuiin chhawmdawlna hrang hrang dawng tura Aadhaar Card neih ngei ngei ngai a lo tih tawh, sut leh tura West Bengal sorkar-in ngenna a thehluh avangin Supreme Court a lungawi lo hle. West Bengal sorkar chuan ram danpui bung 32-na tlawhchhanin he ngenna hi Court sang berah hian a thehlut a, ram danpui bung 32-na hi state sorkar laka lungawi lo, mimal chauhin a hman tura duan a nih avangin, Justice Sikri chuan a lo pawm duh loh bakah, state sorkarin sorkar laipui thutlukna a dodal theih loh thu leh, a duh anih chuan West Bengal CM, Pi Mamata Banerjee-in mimal anga ngenna thehlut tha leh zawk turin, West Bengal sorkar ukilte a lo hrilh a ni.
Vawiin vek kha SC chuan mobile phone hmangtute tan an hming leh chenna finfiahna atan Aadhaar Card chauh a hman theih nia thu thehdarh tawh lo turin Mobile Service Provider te a hriattir bakah, hemi chungchangah hian Department of Telecom hotute nena inberawn turin a ti bawk a, Court sang ber chuan mobile phone number leh Aadhaar Card thlunzawm ngei ngei tur a nih chhan, mumal taka sawi fiah turin sorkar laipui a ti tho a, kar khat chhunga an chhanna thehlut turin a ti bawk.
