AAP MLA 20 ban an nih lohna tura ngenna HC-in ngaihtuah tan dawn

0
668
views

Aam Aadmi Party MLA 20 te ban an nih lohna tura Aam Aadmi Party in Delhi High Court-a ngenna thehluh chu vawiin hian Court chuan a ngaihtuah tan dawn. Election Commission in heng MLA 20 te ban tura a rawtna, President Ram Nath Kovind a’n nimina a pawmpui hnuah, Aam Aadmi Party hian Delhi High Court ah hian ngenna a thlen zui nghal a. AAP ngenna hi Court in a hnawl anih chuan Supreme Court lama zualko chhunzawm zel an tum tih Arvind Kejriwala kaihhruai AAP hotute chuan an sawi AAP MLA 20 te hian kum 2015 March thla atanga 2016 September thla thlenga parliamentary secretary hna an chelh chu danin a phal loh, MLA ni chunga Sorkar atanga hlawkna dang hmuhna, offices of profit ah Election Commission chuan pawmin, Zirtawpni kalta khan President hnenah heng mi 20 te hi MLA an nihna hlihsak tura rawtna a tlen a. AAP hruaitute chuan insawifiahna hun siamsak turin President hi ngen mahse President hian MLA 20 te bantir tura rawtna hi nimin khan a nemnghet ta zawk a ni. AAP hruaitu hlun Ashutosh chuan AAP MLA te bantir tura President thupek chu ram danpui kalh leh mipui rorelna democracy tana thil hlauhawm tak niin a sawi a, Parliamentary secretary te hian minister te an pui a, hlawh leh hamthatna dang an lak loh avangin Parliamentary Secretary an nihna chu Office of profit anga ngaih theih a ni lo a ni a ti. Court hian MLA te banna tur thupek hi a hnuklet anih loh chuan heng MLA 20 te chhuahsan tur bialah te hian inthlan thatna by election neih a tul dawn a. MLA 20 te tel lo pawh hian Delhi Assembly-a AAP sorkarna chu a buai dawn chuang lo thung. AAP hian Member 70 awmna Delhi Assembly ah member 65 a nei mek a, member 46 ah tla thla mahse Sorkar siam theihna khawp member 35 chu an la khum hneh hle thung. Delhi-a eptu party Congress leh BJP te chuan Chief Minister Kejriwal chu a mawh laa bang turin an phut a ni. BJP hian Delhi Assembly ah hian member 4 a nei a, Congress chuan pakhatmah a nei lo thung.