Parliament inthlanna chungchang-a buaina tam tak a awm avang leh thla thum chuang liam hnu pawha result puan a la nih loh avangin President Ashraf Ghani kaihhruai sorkar chuan Independent Election Commission leh complaints commission-a member 12 te chu a ban a ni. Ghani hian political party te leh civil society aiawhte chu kar khat chhunga commission thar ami tur candidate te thlang turin a hrilh a ni.
Aghanistan Attorney General chuan nikum October-a parliament inthlanna-a Independent Election Commission leh complaint commission te an thuneihna hmang suala puhna chu chhui turin thupek a siam a, Commission member ban tak te chu an ram chhuahsan lo turin thu a pe bawk. Afghanistan-ah hian July thla khian President thlanna neih a ni ang.
