Afghanistan thlang lama Farah bialah vawiin khan sipai helicopter a chesual a, mi 25 an thi.

0
1136
views

 

Thuneitute chuan helicopter hi khawchhia vanga chesual a ni an ti a, a khalhtu mi pahnih leh a chhunga chuang mi 23 an thi tih an sawi bawk a, Taliban mi firfiak pawlte erawh chuan an kahthlak niin an chhal ve thung a ni. Thi zingah hian Afghanistan ram thlang lama sipai hotu, Deputy Army Corps Commander pawh a tel tih thuneitute chuan an sawi a ni.

Vawiin vek khan Afghanistan khawpui, Kabul-ah thih chilh bomb chak tak tihpuah a ni a, mi 7 an thi a, midang 5 an hliam.

Police thupuangtute chuan thihchilh bomb kengtu hi kea kal a nih thu leh an rama tanin lian ber, Pul-e-Charkhi tan-in pan tur bus-a a lawn hnuah a bomb pai hi a tipuak tih an sawi a ni. Bomb hi eng pawl mahin an tihah la chhal lo mahse, Islamic State mi firfiak pawlte tihpuah nia rin a ni a, tunhnaia Kabul leh a chhehvela a firfiaka inbeihna chu he pawl hian an tihah an chhal deuh vek a ni.