Agriculture Minister, Pu C. Lalrinsanga’n pangang puangin vaimim a eichhiat sakten zangnadawmna an dawn theih nan Sorkar laipuiah dil a ni dawn tih Zonet a hrilh a, Chhan engemaw vanga thlai chhia chu Sorkar laipuiin a ngaihpawimawh avangin Mizorama pangang puang vanga harsatna tawkte pawhin zangnadawmna hi an hmuh ngei a beisei tih a sawi.

0
229
views

Pu C. Lalrinsanga chuan, kuminah tun hmaa Mizoramin a la hriat ngai loh pangang puang vanga kuthnathawktuten harsatna an tawk chu thil vanduaithlak tak a ni, a ti a. Hetiang thil thleng vang hian USA-ah pawh harsatna an lo tawh phah tawh a, nikum khan India ram lo thlengin, Mizoramah pawh inralrinna thu an puan mek laiin, vawi leh khatah a lo thleng a, hei hi ven theih ni lo mah se, District tina Agriculture Officer-te chu a lehpek awm lo tura pangang puang chu suat a nih theih nan \anla tura tih an ni a, hemi ang hian pangangin thlai a eichhiat sakte chu a kahna hlo leh hmanrua a thlawna pek an ni a, thil awm dan hi a hmunah enfiah zel a ni tih sawiin, tun \uma thlai a tihchhiat bak hi a tichhiat belh loh chuan chhiatna nasa zawk thleng lova pangang puang chu ven theih a nih a beisei thu a sawi.

Agriculture Minister chuan, pangang hian khawilai emawah bu khuarna an nei ang a, tuna vaimim a eichhiat bakah hian buh leh thlai dangah pakaiin chhiatna lian zawk a thlen ang tih chu an thil hlauh thawn ber a ni, a ti a. Hei hi a thlen loh nan an Department chuan theihtawp a chhuah dawn a, pangang hi thawk leh khata lo pung thut a nih avangin ven lawk theih ni lo mah se, hnathawktute chu a \ul huna che chhuak thei turin an inring reng tih a sawi. Zawhna chhangin Pu C. Lalrinsanga chuan, tuna pangang puangin vaimim a eichhiat sak zawng zawng chu a hlut zawng chhut chhuakin, heng mite hian zangnadawmna an dawn theih nan sorkar laipuiah dil a nih tur thu a sawi a. Tun dinhmunah chuan pangang hian vaimim tih loh thlai dang chu a la khawih rih lo nia an hriat thu a sawi.

Agriculture Department chhinchhiah danin, pangang puang hian cheng vbch. 18 leh nuai 4 man hu vel Vaimin a eichhe tawh a, pangang puang chungchanga hmalak dan tur leh sorkar laipuia \anpuina dil dan tur hi vawiin khan Agriculture Minsiter, Pu C. Lalrinsanga hovin Chief Secretary leh Agriculture Department hotuten an sawi ho a ni.