He thu hi Agriculture Deartment hnuaia Agricultural Technology Management Agency (ATMA)-in vawiina State Level Workshop cum Exhibition an buatsaihah sawiin, tun hmaa sorkar a\anga \anpuina dawnga, zelthel taka hnathawk leh si an awm \hin chu thil \ha lo tak niin a sawi a, MNF kaihhruai sorkar thar chuan a tak taka hna a thawh dawn avangin hetiang tih tumte tan hmun a awm dawn lo tih a sawi. Pu C. Lalrinsanga chuan, hun awl rei lo hle chunga Mizoram mai ni lo, ram puma ATMA hmalaknain rah \ha a chhuah mek chu thil lawmawm tak a ni a ti a, kuthnathawktute ham\hatna tura sorkar laipuiin Agency hrang hrang kaltlanga ruahmanna a siamte tihlawhtling turin heng Agency hrang hranga thawkte leh a kaihhnawih State Department-te chuan thawh hona \ha zawk an neih zel a ngai tih a sawi. Agriculture Minister chuan, ram dang a tlawh ve tawhna a\angin lo neih leh a kaihhnawih lama an hlawhtlin chhan chu kuthnathawktute, sorkar hnathawk leh mithiam bikten inlungrual leh inpawh tlang taka hna an thawh ho \hin vang nia a hriat thu sawiin, hetiang taka thawh hona \ha hi Mizoramah pawh a awm chuan hlawhtlinna sang zawk an hmuh zel a beisei tih a sawi.
Hawnna inkhawm Synod Conference Centre-a neih hi Agriculture Secretary, Pu Lalhmingthanga’n a kaihruai a, khualzahawm Aizawl South III bialtu MLA, Prof. F. Lalnunmawia pawhin, sorkar laipuiin kuthnathawktute tana ruahmanna a siam tawh zingah ATMA chu a hlawhtling berte zinga mi a ni tih a sawi a. Mizoram bikah Department mithiamten lo neih leh a kaihnawih thil pawimawh hrang hrangah kuthnathawktute \um engemawzat zirtirna an pe tawh leh Demonstration Farm-a Training hlawhtling tak an nei tawh \hin chunga kuthnathawktuten a taka an thil zir an hmang zui lo \hin chu a chhan zirchian a \ul a, kuthnathawktute pawhin mithiamte zirtir ang ngeia hmalak chhunawm nachang an hriat a \ul tih a sawi.
He inkhawmah hian ATMA hmalakna hrang hrang hlawhtling taka kalpui leh hnathawk \ha thlanchhuahte hnenah lawmman leh chawimawina chi hrang hrang pek a ni a, he zirhona hi naktuk thleng neih tur a ni a, hemi ruala exhibition neihah hian Sericulture, Fisheries, Agriculture, KVI, Central Integrated Pest Management Centre, Mission Organic Mizoram, KVK, ICAR-te bakah Mizoram University-a Biotechnology Department, Horticulture Aromatic and Medicinal Plants Department leh Selesih-a College of Veterinary Sciences a\angin an hmalak dan tarlan a ni a, an thil thar chhuahte a duh apiang lei theihin an zuar chhuak nghal a ni.
