Aizawl-ah zirtawpni thleng awh tur NLUP Kutpui tan

0
1197
views

NLUP Kutpui chu vawiin atang khan Aizawlah tan a ni a, Zirtawpni thleng a awh tur he kutpui hi Chief Minister, Pu Lal Thanhawla’n a hawng a ni. NLUP Kutpui hawn hmaa inkhawm Assembly Annexe Conference Hall-a neihah Chief Minister chuan, NLUP chu Pathian lam hawi programme nia sawiin, vawiin thlengin a hlawhtlinna an hmu chho zel niin a sawi a, NLUP chu mithenkhatin sawisel thin mah se, mirethei leh harsa zawkte khai chhuahna tura duan a nih avangin an chhunzawm zel dawn tih a sawi. Pu Lal Thanhawla chuan, rambuai kha Mizo zawng zawngin an tuar vek tih sawiin, remna a awm hnuah kal ngaihna hre lo rahbi tleu tam takte khai chhuah nan rangva inchung nei lo hnenah rangva an pek tur thu leh eizawnna bul an tan nan chhungtin cheng sing 3 theuh pek an tiam tih sawiin, hei hi NLUP lo intan dan a ni a ti a, vawiin thlengin hlawhtling taka chhunzawm a ni a, a dawngtu zingah titha peih lo leh zelthel deuh engemawzat awm bawk mah se, dikna, rinawmna leh taimakna nena beitute chuan an hlawhtlinpui mek a ni a ti. Chief Minister chuan, NLUP hlawhtlinna hian khawvel khawi hmunah pawh Economist leh Fiancialist ropui ber berte pawm loh theih loh Statistic a keng nia sawiin, India ram pum sum leh pai thanna chu zaa 7 vel a nih laiin, Mizoram thanna chu zaa 8 chunglam a ni a ti a, sum lakluh tam zawng, per capita income pawh ram pum atanga tehin Mizoram a sang zawk niin a sawi.

State Planning Board Vice Chairman, Pu H. Liansailova pawhin, NLUP chu enge a nih tih ngun taka ngaihtuah tura mipuite ngenin, tun aia tha lehzuala kalpui a nih theih nan ngaihtuahna senpui turin a sawm a. Mithenkhatin sem policy that loh thu leh NLUP hlawmchham zia sawi thin mah se, thingtlang lama dinhmun chhe laklawh, tanpuina tel lova khai chhuah theih loh khawp mi tam tak an awm tawh niin a sawi. He inkhawm hi NLUP Implementing Board Chairman, Pu JH. Rothuama’n a kaihruai a, NIB Vice Chairman, Pu PL. Thanga’n NLUP Kutpui buatsaih a nih dan a sawifiah bakah Kut hawngtu Chief Minister, Pu Lal Thanhawla’n NLUP lehkhabu ” Sustainable Land Use Initiatives in Mizoram” tih leh NLUP Kutpui puala Lukhum siam a tlangzarh a, a hawnna inkhawmah hian Minister, MLA, Sorkar mipawimawh leh kuthnathawktu thahnem tak an tel a ni. NLUP Kutpuiah hian NLUP tanpuina hmanga din dawr 100 chuang hawn a ni a, heta an thil zawrh chi hrang hrang hi a man pangngai aia zaa 20-a tlawma lei theih a ni.