Aizawl District Election Officer bultumin vawiin khan pianphunga rualbanlo leh vote nei tharte tan vote thlak leh a kaihhnawih chungchang zir hona neih a ni.

0
533
views

Hemi puala inkhawm Aizawl Lammuala neih hi Aizawl District Dy. Election Officer, Pu VL Hruaizela’n a kaihruai a, a hmanpuitu Joint Chief Electoral Officer, Pu H. Lianzela chuan, thla leh maia MP inthlan leh Aizawl West I biala Bye Election neih turah Assembly inthlanpui neih zawh taka vote tla zat aia zaa 10 tala vote tla a tam theih nan vote nei zawng zawng chu vote thlak vek turin an sawm tih a sawi a. Vote tla hi a \hat theih nan Vote nei thar leh rualbanlote chu an pawimawh dawn hle tih sawiin, a bikin pianphunga rual banloten vote an thlak vek theih nan State level Steering Committee on Accessible Election chu CEO kaihhruiana hnuaiah din a ni a, Polling station tinah pawh an mamawh tur hrang hrang duan a ni tawh tih a sawi. Pu H. Lianzela chuan, kum 18 tling tawhte tan vote thlak chu an chanvo nimai lovin, an tih tur a ni tih hriat a ngai a ni, a ti a. Vote thlak chu ram rorelnaa mipuiten aw an chhuah theihna hmaraw \angkai a ni tih avangin ngaih pawimawh a \ul tih a sawi.

He inkhawmah hian Aizawl District Election Officer, Pu Lalfakzuala’n EVM a vote thlak dan leh VVPAT hmanga vote a tla finfiah dan a hrilhfiah a. Tuna India ramin a hman mek VVPAT chu a him tawk tih sawiin, khawih chingpen mai mai theih a ni lo tih a sawi. Pu Lalfakzuala chuan, vote thlak turte chu vote thlakna hmuna an kal dawnin, vote thlakna tura finfiahna a tan – Voter ID, Passport, Driving Licence, Service ID, Bank Passbook, Pan card, Ministrry of Labour-in Smart card , MGNREGS Job Card, Health Insurance Document, Aadhar Card leh Pension Card zinga khawi emaw ber ken nachang hre turin a fuih a ni.

Kumina Lok Sabha inthlanpui neih turah hian mi zawng zawng huapzo inthlanna neih a nih theih nan Mitdelte tan EVM Balloting Unit-a candidate zawnah mitdel hawrawp hmanga ziak number pek vek a ni dawn a, kea kal thei lote tan Polling Station chhunga veivahna tur wheelchair dah a nih dawn bakah a \ulna apiangah kailawn dawh a ni dawn a. Rualbanlo vote thlak turte chu inn atanga Polling station an panna leh an haw lehna tur lirthei ruahman sak an ni dawn a, \awngtheilote tan hriat awlsam turin Polling official te hnenah basic sign language zirtir an ni bawk a ni. Pianphunga rualbanlote chu vote thlak tura rei tak an nghah a ngaih loh nan zing dar 9 leh dar 11 inkara polling station an thlen hman chuan vote thlak nghal tir tura ruahman a ni bawk.