Aizawl FC-in tun season atana an match hnuhnung ber khel, 3-1 in chak, Super Cup khel thei chiang sa

0
535
views

I League khelh mekah Champion lai Aizawl FC-in nimin khan Mualpuia Rajiv Gandhi Stadium-ah tun Season atana an Match hnuhnung ber khelin, an mikhual Gokulam Kerala FC chu 3-1 in an hneh. He inkhelah hian mikhual Team Gokulam-in First Half Minute 25 naah Penalty atangin Goal hmahruai an thun a, Goal dang lut lovin chawlh lawk an hmang a. Second Half-ah mualneitu Aizawl FC-in Leonce Dodoz Goal 2 leh Lalkhawpuimawia Goal 1 hmanga chhang letin Chapchar Kut ni-ah hnehna an chang a ni. Team 10 telna I-League-ah hian Mizo Club Aizawl FC-in an khelh tur Game 18 an khel zo tawh a, heta tang hian vawi 6 hnehna changin, vawi 6 an chak lo thung a, tum 6 an khingpui an inhnehtawkpui a ni. Tun dinhmunah Aizawl FC chu hian Point 24 hmuin Table-ah 5-na an ni mek a, Season tawpa ISL Club nen Super Cup an khelh turah Playoff khelh ngai lovin an tling chiang sa a ni.