Aizawl khawpui chhung bawlhhlawh paih dan phung thar chungchang UD&PA Minister leh Aizawl Municipal Corporation Mayor leh Commissioner ten sawi ho

0
765
views

Vawiin khan UD&PA Minister, Pu Zodintluanga’n Aizawl Municipal Corporation Mayor leh Commissioner chu lengah sawmin, tunlaia Aizawl khawpui chhung bawlhhlawh paih dan phung thar chungchang a sawipui a, sorkarin bawlhhlawh paih motor 54, tun hnaia AMC a pek chu Aizawla bawlhhlawhte chak lehzual zawka lak khawm a nih theih nan ni mah se, bawlhhlawh paihna tur motor thar pek a nih hnuah hian bawlhhlawh senghawi loh tam tak, Aizawl khawpui hmun hrang hrangah hmuh tur a awm ta zawk nia sawiin, mipui atangin amah ngei pawhin sawiselna tam tak a dawn thu a sawi. He harsatna, Aizawl khawpuia thleng mek hi ching fel thuai turin UD&PA Minister chuan AMC Mayor, Pu PC Lalhmingthanga chu a ngen a ni.

AMC Mayor chuan hemi chungchang ngaihtuah tura din Committee pawhin naktukah hemi chungchang hi ngaihtuah a tum thu, Minister chu a hrilh a. Tun hma chuan bawlhhlawh paih nan hian motor 140 vel hman thin a ni a, motor thar an neih hnu hian motor 100 vel hman a nih thu leh, heng motor-te hi zing zawka tlantir tum a nih thu a sawi bawk.

UD&PA Minister chuan Aizawl khawpui chhungah hian tun hma chuan kawngsirah bawlhhlawh chhek khawm a nih avangin a rimchhe em em a, mipui pawhin an sawisel nasa hle a, sorkar chuan Local Council-te nena tangruala bawlhhlawh lak khawm dan tur a ngaihtuah a, kum 2010 October ni 4 atangin Local Council 60 nena thawk hovin, Public Private Partnership (PPP) Mode-in bawlhhlawh hi paih a ni ta a, tuna bawlhhlawh paih dan thar hnuaia kawngsira bawlhhlawh chhek khawm a awm leh ta chu sorkarin a ngai thutak hle tih a sawi bawk.

Bawlhhlawh paih dan phung tharah hian AMC chuan motor te chi hmangin Local council-te chu bawlhhlawh a paihtir a, motor lian, garbage vehicle hmanga bawlhhlawh lak khawm leh paih chu Local Council kut atangin a laksak thung a, hemi atan hian Aizawl khawpui hi Zone hrang hrang pakua-ah thenin, Contractor pakua thlan an ni a, hengte hi motor thar hi hmantir an ni. Puan tawh angin, tun hnai khan Aizawl khawpui laili lai, Zarkawt-ah leh Tuikual-a Congress Bhavan chhuk thla-ah te bawlhhlawh nasa taka chhek khawl a ni a. Zarkawt-a bawlhhlawh chhek khawl chu paih fai a ni tawh a, vawiin khan Tuikual South-a bawlhhlawh chhek khawl pawh then fai a ni bawk.