Aizawl khawpui chhunga thuneitu nih inchuhna boruak anga ngaih theihin AMC in phalna a pek Aizawl Tennis Court bula Serthlum zuarte chu vawiin khan Police ten an serthlum zawh \um hnih an khawm sak.

0
552
views

Helai Serthlum zuartute chuan, an inzawrhna hmun chu DC thupek anga inzawrh phal lohna hmun a ni tih nimin khan Police ten hrilhin, inzuar chhunzawm tawh lo turin an hrilh tih Zonet an hrilh a, Helai hmuna inzawrh phalna hi nikum November ni 15 khan AMC-in mi 14 hnenah a pek thu leh License fee pawh mimal tinin Rs. 250 \heuh an pek thu an sawi thung a, AMC-in inzawrh phalna a pek hi thla 4 chhung nung tur a nih laia Police lamin DC thupek chhuanlama inzawrh an phal lo chu an hriatthiam loh avangin nimin khan AMC Commissioner, Dr. H. Lalthlangliana hnenah an harsatna tawh thu hi an thlen a, ani chuan helai hmuna inzawrh phalna hi AMC-in a pek anih thu leh an inzawrh leh zawrh loh chu AMC thuneihna a nih thu lo hrilhin, hlauthawng lova inzuar chhunzawm turin a lo hrilh tih an sawi.

AMC hotute thu zawma vawiina an inzawrh lai hian chhun dar 12 velah Police te chuanan serthlum zawrh chu ruh khawm sakin, a neitu aiawh mi 2 nen Police-te hian an man a. Police Station an panna kawnga Canteen Kual an thlen laiin an mahni mantu Police-te chuan Phone Call an dawn hnuah an inzawrhna hmun Tennis Court bulah an thil zawrh leh a neitute hi dah let lehin an kal san a. Hemi hnu hian serthlum zuarte chu an inzawrh chhunzawm leh a, rei lote hnuah Police dang lo kal lehin, an serthlum hi an ruh sak leh a, serthlum zuarte chu inzuar chhunzawm lo tur leh an inzuar chhunzawm a nih chuan an man tur thu hrilhin, an kal san leh a. Hetiang thil awmdan ni mah se, Serthlum zuarte chuan AMC a\anga helai hmuna inzawrh phalna hi an neih avangin serthlum hi an zuar chhunzawm leh tho a ni.

Zonet zawhna chhangin Serthlum zuarte chuan, an serthlum zawrh chu Mizoram thar chhuah vek a nih thu leh Mizoram chhungah serthlum thar an tam avangin a thartute ngenna anga zawrh sak an nih thu an sawi a, Serthlum thar a tam avangin an zuar seng lova, phai lam a\anga khar chhawngtu awm lo phei se chuan tlawm tak taka hralh tur pawh tam tak a awm dawn niin an sawi a, nimin piaha Police-in inzuar tawh lo tura an tih bak tunhmain helai hmuna an inzawrh hi sawiseltu an la awm ngai lo niin an sawi. Serthlum zuarte chuan, thlai thara Mizoram a intodelh theih nana nasa taka \an a lak mek laia Mizoram chhunga thar chhuah ngei Serthlum zuarte harsatna siamsak an ni chu inhmeh lo an tih thu an sawi bawk.

Tennis Court bula Serthlum zuarte man an nih chungchang Zonet zawhna chhangin Aizawl Addl. SP, Police thupuangtu nibawk, Pu PC Lalchunglura chuan, Aizawl DC thupek bawhzuia Serthlum zuarte hi thenfai an ni tih a sawi ve thung a, helaia inzuarte hian AMC a\angin inzawrh phalna nei angin insawi mah se, an phalna neih chuan mihring kalna atana siama inzawrh phalna a huam a rin loh thu a sawi.

Hetihlai hian AMC Commissioner, Dr. H. Lalthlangliana chuan, Tennis Court bula serthlum zuarte chu Vendor Control Act hmanga inzawrh phalna License hi pek an ni tih Zonet a hrilh a. Tuna License an pekte hi February thla thleng chauh nung tura tih niin, tunlai hi Serthlum thar lai hun a nih avangin serthlum zuar bikte tan liau liau Temporary-a pek an nih thu leh kuthnathawktute thawh rah tha taka an hralh theih nana siam sak an ni tih a sawi. Dr. H. Lalthlangliana chuan, AMC thuneihna chu khawlaia thil zuar, Vendor leh Foothpath enkawl a ni tih a sawi.

Puan tawh angin AIzawl DC, Dr. A. Muthamma chuan, tun thla ni 24 khan khapna thupek tichhuakin mi\henkhatin motor kawng dung leh kea kalnaahte thil an zuar thin chu mipui harsatna thlentu a nih avangin heng hmun hrang hrang – Sikulpuikawn leh Mission Veng Presbyterian Biak In inkar kawngpui kam leh kea kalnaah te, Revenue Directorate leh Excise & Narcotics Commissionerate inkar kea kalnaah te, Tennis Court chhehvel kawngpui kam leh kea kalna, Tennis Court leh Agriculture Directorate inkar kawng kam tawn tawna inzawrh phal a nih loh thu a tarlang a. Hei hian khapa thupek chhuah ni tun thla ni 24 a\anga ni 60 chhung a huam a, thupek awih lote chu dan anga an chunga hrem tur niin, he thupek hian inrinni leh sorkar pisa chawlh a huam lo a ni.