Aizawl khawpuia motor kawngpui leh lirthei enkawl kawngah thuneihna chin felfai taka insem a nih loh avangin harsatna tam tak a thleng

0
521
views

Aizawl khawpuia motor kawngpui leh lirthei enkawl kawngah thuneihna chin felfai taka insem a nih loh avangin harsatna tam tak a thleng. Aizawl Traffic Police bultuma lirthei him taka hman theih dan tur Road safety chungchang vawiina Aizawl Press Cluba zirhona atanga a lan danin, Aizawl khawpuiah hian lirthei che vel enkawl hna chu Traffic Police te kut a nih laiin, khawpui kawngpui enkawl chu PWD lam hna a ni ve leh thung a, Khawpui chhunga thuneitu chu AMC a nih bawk si avangin Traffic sign leh kawngpuia chhinchhiahna siam kawngah te, lirthei dahna hmun, parking siam kawngah te leh mipui ke-a kalna tur Footpath siam kawngah te thuneitu mumal tak an awm lo a ni. Sawihona-ah zawhna chhangin Traffic SP Pu C Lalthanmawia chuan Aizawl khawpuia Local Council ten garage nei leh nei lo an enfiah mekah Local Council 4 in an la zofel lo tih a sawi a. Khawpuichhung Local Council 83 zingah veng 4, Armed veng, Tuikual South, Mission veng leh Salem veng ten garage endik hna hi an la zo fel lo a ni. Pu C Lalthanmawia chuan, Aizawl DTO chhinchhiah danin nikum July thla thleng khan lirthei 1,26,470 register a ni a, heng zinga 1,18,976 chu mimal lirthei leh 7,496 chu sorkar lirthei a ni a, heng zinga zaa 60 vel chu Aizawl khawpui chhungah nitin che thin anga chhut a ni a ti. Aizawl DTO hnuaiah nitin lirthei 30 atanga 40 vel register ziah anga chhut a nih thu Pu C Lalthanmawia chuan a sawi bawk a, Aizawl DTO hnuaiah lirthei ke 2 nei chi 80,184 awm anga ngaih a ni a, heng zinga 78,899 chu mimal ta leh sorkar enkawl 1,285 a nih thu sawiin heng zinga zaa 70 chu khawpui chhungah a chevel nia chhut a ni a ti.

Road Safety chungchang sawitu Traffic Dy. SP C Vanlalvena chuan, khawvelah kumtin lirthei chetsualna nuai 13 vel thleng anga ngaih a nih thu a sawi a, nitin lirthei chetsualna avang nunna chan mi 3,287 awm anga chhut a ni a ti a, Ramchhungah kum 2016 chhungin lirthei chetsualna tum 4,80,652 thlengah nunna chan 1,50,785 an awm tih a sawi a, heng lirthei chetsualna thleng zingah hian lirthei ke 2 nei chetsualna a tam ber tih sawiin zaa 33.8 a tling a ni a ti. Pu C Vanlalvena chuan, kum 2008-2016 inkar chhungin Mizoramah lirtheia chetsualna tum 988 a thleng tih a sawi a, nunna chan 757 an awm thu sawiin nikum chhung khan lirthei khaltu fimkhur loh avanga chetsualna tum 52 thlengah mi 48 in nunna an chan tih a sawi bawk. Road Safety chungchang zirhona ah hian I&PR Dierctor Pu David L Thangliana leh MJA President Pu Vanlalrema Vantawl te pawhin thu an sawi.