He thu hi vawiina Chanmari Aizawl North III Congress Campaign Office hawnna, Campaign \anna ni bawkah sawiin Pu Lal Thanzara chuan, tu sorkarah nge ram hi a ralmuan a, kuthnathawkte an thlamuan tih ngaihtuah turin mipuite a ngen a, mautam \ampui mitthia \anpuina Baffacos sum tichingpentuah MNF sorkar puhin an hunlaiin kuthnathawktuten Aizawlah chemtum nen kawng an zawh niin a sawi a, MNF sorkar laiin Mizoramah hel khawi ngam an ni tih sawiin, Presbyterian kohhran sakhaw puithiam meuh tualthihna thlen laia sorkarna chelhtu chu MNF sorkar a ni tih a sawi bawk.
Pu Lal Thanzara chuan MNF-in kum 10 chhung Mizorama sorkar an chelh chhung khan hnathawh \hat rotling sawi tur an nei lo niin a sawi a, Congress a sorkar loh chuan Mizoramah Central-a BJP control theih party-in sorkarna a chang dawn tih sawiin, BJP duhlotute chu a thawhpui tur party vote lo turin a sawm a ni.
Pu Lal Thanzara chuan ZPM Chief Minister Candidate, Pu Lalduhoma’n BJP nena thawhho a hnial loh thu an inbiakna hriat ruk a\angin a lang niin a sawi a, BJP nena thawhdun chu Mizo hnam leh sakhaw tan thil pawi niin a sawi bawk.
He inkhawm hi Chanmari Congress Unit Campaign Committee Chairman, Pu Lalzuiliana’n a kaihruai a ni.
