Aizawl pa pakhat, March ni 16-a Lengpui \umhmun a\anga Aizawl rawn lut chu hri leng mek, coronavirus a kai tih nizan khan finfiah a ni a. Thlawhna-a a chuanpuite leh amah hnaiha lo awm tawh te chhui zui nghal an ni.

0
399
views

Mizorama coronavirus kai hmuh chhuah hmasak ber hi, patling kum 50 mi a ni tih Health Minister Dr R Lalthangliana chuan vawiin khan chanchinbumite kawmin a sawi a, amah hi Amsterdam (Netherlands) a\anga chhuakin, Doha, Qatar paltlangin, March ni 15 khan New Delhi a lut a, March ni 16 khan Indigo Airline, Flight number 6E 939 ah chuangin New Delhi atangin Guwahati a thleng, hemi ni vek hian GoAir Flight number G8X/G8298 ah chuangin Lengpui Airport ah a rawn \um a ni.

March ni 16-a Delhi leh Guwahati inkar thlawhnaa a chuanpuite leh Guwahati leh Aizawl inkara thlawhnaa-a a chuanpuite zawng zawng hi an hming chhui chhuah nghal a ni a, Police te leh Health Dept lam hotuten umzui nghalin, inkhung hrang turin an hriattir nghal a, Local Level Task Force te pawhin sorkar hi puibawmin an huam chhung \heuhah a chuanpuite an dapchhuak mek a, vawiinah pawh khan a chuanpui Aizawla awm mek, chhui chhuahte chu Doctor-ten an chenna in-ah tlawhin, an hriselna an endik sak a, an mahni leh an chenpuite chu in lama inkhung hrang tura hrilhin, thupek hi an zawm leh zawm loh lo enfiah \hin turin Local Level Task Force-te hriattir an ni. Thenzawl JNV-a zirtirtu pahnih chu thlawhnaah hian an chuang ve tih hriat a ni a, Sorkar thuneitute leh Thenzawl Joint Task Force \angkawpin JNV-a zirtirtu te hi pawn chhuak lo turin an ti nghal a, zirlaite erawh an lo chhuak vek hman tawh a ni.

Thuneituten an la biak pawh loh, thlawhna-a a chuanpuite chu mahni thua lo inkhung hrang nghal turin thuneitute chuan an ngen a, a rang thei ang bera Health Dept hotute emaw COVID-19 Helpline- 102 (toll free), 0389-2323336/2318336 ah te in report tura ngen an ni.