Aizawl-Thenzawl-Lunglei World Bank kawng-a a chhe zual lai siam hna Tantia Construction Company leh SLT pe fel

0
434
views

Aizawl-Thenzawl-Lunglei World Bank kawng-a a chhe zual lai, Tlawng leh Pukpui inkara Cement Concrete kawng siam hna chu PWD chuan, Tantia Construction Company leh SLT a pe fel ta. ZONET zawhna chhangin PWD Chief Engineer Roads, Pu R. Lalrintluanga chuan, he kawng-a Rigid payment siam hna thawk tura thlan contractor pahnihte hian tunah hian hnathawktute awmna camp sa in hnathawhna tur khawl bun hnate hmanraw lak khawm leh mihring lak khawm hna an thawk mek a, kawng siam hna hi a rang thei ang berin tan a ni anga, Rigid payment an siamna tur kawng thui zawng hi KM 2 vel dawn lai a tling a, kumin fur hma ngei a zo fel hman turin hna an thawk dawn a ni. He lai kawng chhe zual lai siam nan hian Mizoram sawrkar chuan NEDP sum Rs.2,00,00,000/- a ruahman belha, hemi hma lam hian Lunglei Division in hna an thawh nan Rs.1,70,00,000/- bakah NEDP sum atangin Rs.1,00,00,000/- pek belh a lo ni tawh a ni. He kawng chhe zual lai siamthat hna thawh mek hi naktukah PWD Minister Pu Lal Thanzara leh Chief Engineer Pu R. Lalrintluangate chuan a hmunah an tlawh dawn a ni.