Aizawl-Thenzawl-Lunglei World Bank kawng chhe lai siamthat dan tur PWD Minister-in enfiah

0
323
views

PWD Minister, Pu Lal Thanzara chuan Chief Engineer Roads Pu R. Lalrintluanga hruaiin Aizawl-Thenzawl-Lunglei World Bank kawng chhe lai siamthat dan tur nimin khan a enfiah. Aizawl atanga Thenzawl lam atanga kalin nimin khan Tlawng leh Pukpui inkara kawng chhe zual lai cement concrete-a siam ngai lai te an en a, Rigid Pavement an tih, cement concrete-a siam ngai hmun 9-ah an ruahmana, a siam tur hian Tantia Construction Company leh SLT Infracon te ruat an ni. Minister leh Chief Engineer te hi Lunglei Circle Superintending Engineer, Pu C. Lalchhuana leh Officer dangten an lo dawng sawng a, hnathawh dan tur an ruahman dan chuan tha tawka hna thawh a nih theih nan lung, rora leh balu te chu Mizorama hmuh theih zinga tha tawka hriat hman a ni ang a, hnathawh dan chu PWD Officer te chuan an vil reng dawn a ni. Tlawng leh Pukpui inkara kawng chhe zual lai cement concrete-a siam hna hi naktuk atanga tan a nih dawn avangin he kawngah hian lirthei kal tir phal a ni dawn lova, motor te te chu Haulawng atanga Dawn lama kalna kawnga kal tura hriattir an ni a, motor lian te erawh chu he kawnga kal lovin National Highway 54-a kal tura hriattir an ni. PWD Minister chuan Aizawl-Thenzawl-Lunglei World Bank Road chu Mizorama State Highway zinga pawimawh ber a ni tih sawiin, a enkawlna sum erawh chu sorkar laipui tum ni lovin, Mizoram sorkar tum a ni tih a tarlang a, sum a tam tawk loh avangin sum awm thei ang ang leh NEDP sum te hmangin siamthat zui zel a ni dawn niin a sawi a ni. He kawng hi siam zawh a nih hnuah kum 2010 khan Mizoram PWD kutah hlan a ni a, heta tang hian kawng chhuat chhia siamthat a la ni lo a ni.