Aizawla mimal leh sorkar motor intlanchhawk dan tur ruahman

0
1194
views

Thla leh, October thla atanga Aizawlah mimal leh sorkar motor intlan chhawk dan tur ruahman a ni. Home Minister, Pu R. Lalzirliana hova nimina Chief Secy Conference Hall-a thu khawm, Traffic Management Co-ordination Committee chuan Aizawl khawpuia motor tawt tihziaawm dan tur thenkhat a ruahman a, hengte zingah hian – Aizawl khawpui chhunga ni tina motor tlan tihtlem nan October thla atangin a en chhin nan mimal leh sawrkar motor zawng zawng chu a chhawka tlan ni se, motor number a digit tawp ber chu thla khata ni indawta a number thlen apiangin a tlan lo ang a. Motor number, 1-a tawp chu thla tin tahrik ni 1, ni 11, ni 21 leh ni 31-ah a tlan thei dawn lo tihna a ni a, hetiang bawk hian motor number, 4-a tawp chu tahrik ni 4, ni 14 leh ni 24 ah a tlan thei dawn lo tihna a ni. Hemi bakah hian kumin December ni 1 atangin Aizawl Municipal Area huam chhunga motor nei zawng zawng chu motor in, garage nei vek tura beisei an nih angin hriattirna pawh chanchinbu leh Local Cable TV-ah chhuah thin a ni a. Local Council tinin anmahni bial theuhva lirthei awm zat leh garage nei leh nei lo, uluk takin chhinchhiah se an ti a, Traffic Police-ten garage nei leh nei lo hi awlsam zawka an thliar hran theih nan a bik siam sticker bel ni se an ti bawk. Kawng sira motor dah chu khawpui chhung tawt chhan langsar tak a nih avangin kawngsir parking area ni lova lirthei dahte chu dan awm sa tlawhchhana hnuh sawn theih a nih thu pawh sawi nawn a ni a, khawpui dai hmun remchangah motor lian, 407 leh a chung lam dinna tur siam ni se tih a ni bawk. Traffic Management Co-ordination Committee chuan sorkar hnathawk, sorkar motor kawlte pawhin a dahna, motor in an nei tur a ni tih sawiin, an neih loh chuan office-ah emaw hmun dangah emaw a dahna tur an zawng tur a ni, a ti bawk.