Amit Shah leh Smriti Irani Rajya Sabha member atan lalut

0
592
views

Vawiin khan BJP President, Amit Shah-a leh Union Minister, Smriti Irani-i chu Rajya Sabha member atan lak luh an ni a, House Chairman, M Venkaiah Naidu-a;n rinawmna thu a tiamtir a ni. Lak luh an nih lai hian House-ah Parliamentary Affairs Minister, Ananth Kumar, Finance Minister, Arun Jaitley leh Law Minister, Ravi Shankar Prasad pawh an awm a, Pi Irani-i hian Sanskrit-in rinawm thu a tiam a ni. Puan tawh angin, tun hnaia Gujarat-a Rajya Sabha member thlanna-ah khan BJP candidate pahnih, Pu Shah-a leh Pi Irani-i te hi vote 46 ve ve hmuin an tling a, Pu Amit Shah-a hnena an ballot paper hmuhtu, Congress MLA pahnih vote chu Election Commission-in a hnawl hnuah Congress candidate, Ahmed Patel-a pawhin tling tura vote a mamawh zat, 44 chiah chiah hmuin a tling hram a ni. Kha inthlan lai vel khan Congress chuan party chhuahsan tumte khuahkhirh nan Bengaluru-a Eagleton Golf Resort-ah MLA 44 a khung khawm a, hemi hnu hian party MLA-te hi Gujarat-a Anand district-a Borsad khawpui bula chawlhna in pakhat, Neejanand resort-ah a khung khawm leh bawk a, Congress chuan a party MLA-te hi Gujarat-a rorel lai party, BJP-in a vau reng avang leh, party phatsana BJP an thlawp theih nan cheng 15,00,00,000 peka an thlem thin avangin thawn bo an ngai niin a sawi.