Archaeological Survey of India, Aizawl Circle chu Union Minister of State, Dr Mahesh Sharma-a’n a hawng

0
701
views

Aizawl Tuikhuahtlanga Archaeological Survey of India, Aizawl Circle chu vawiin khan Union Minister of State for Culture, Dr. Mahesh Sharma-a’n a hawng a. Hnam ziarang leh thlahtute hun lo hman tawh dan chu hnam rohlu a nih thu sawiin, heng hnam rohlute hi ram leh hnam chakna pakhat a nih avangin humhalh thiam a pawimawh tih a sawi. Hnam ziarang leh thlahtute sulhnu, hai chhuah loha awmte hmuchhuak turin ASI chuan ram pumah hna a thawk tih sawiin Minister chuan, Mizoramah pawh ASI Aizawl Circle hawn a nih tak avangin pi leh pute sulhnu hai chhuah kawngah chak zawka hnathawh theih a beisei thu a sawi. Dr. Mahesh Sharma chuan, hmarchhak bialah kawng hrang hranga hmasawnna chak zawk a awm theih nan sorkar laipuiin hna tam tak a thawk tih sawiin, ram zalenna champha vawi 75-na lo thleng tur pualin kum 2022-ah India chu zalenna sual chhuaktuten an lo mitthla \hin ang taka ram ralmuang leh fai, retheihna-in a tihbuai tawh loh, dikna-in ro a relna ram, chi leh hnam hrang inkara inthliarna awm lohna siam a nih theih nan khua leh tui zawng zawng ke pen turin a sawm nghal a ni.

Larsap, Lt. Gen. Nirbhay Sharma pawhin ASI Aizawl Circle hawn a ni chu Mizoram tan thil chhinchhiahtlak a nih thu a sawi a. Mizo zingah pipu a\anga inhlan chhawn, hnam ziarang leh zemawi nghet tak a awm a, hun kal tawha pipute nun dan leh inrelbawl dan te, chiang zawka hre turin an sulhnu, thil hluite laih chhuah leh zawn chhuah a nih chuan hnam tana thil \angkai a ni dawn tih sawiin, tun hnaia Vangchhia leh hmun danga pi leh pute sulhnu hmuh chhuahte chu zir chiana ngaihhlut nachang hriat a \ul hle tih a sawi. Art & Culture Minister, Pu R. Romawia pawhin, kum 1894-a Welsh Missionary-ten Mizo hawrawp an siam hma kha chuan Mizo chanchin, ziaka chhinchhiah a awm loh avangin, tun a\anga pipute sulhnu zawn chhuaha zir chian a nih chuan Mizo chanchin tihausa thei tur thil pawimawh hmuh chhuah tur tam tak a awm theih a beisei thu a sawi. Vawiina ASI Aizawl Circle hawnnaah hian INTACH Mizoram Chapter Convener, Pu P. Rohmingthanga, ASI Regional Director, Dr. M. Nambirajan, Add. Director General, Pu Rakesh Singh Lal leh Asst. Superintending Archaeologist, Dr. Sujeet-ten thu an sawi a. Mizorama ASI hnathawh tawh dan, Preliminary report chu tlangzarh a ni bawk. ASI Aizawl Circle hian Mizoram bakah Manipur leh Tripura a enkawl dawn a, Superintending Archaeologist-in a \hutchilh dawn a ni.

Union Minister of State for Culture, Environment, Forests & Climate Change, Dr. Mahesh Sharma hian zan khat riakin Mizoram a rawn tlawh a. Nimin chawhnu khan Aizawla Millennium Centre chung zawlah hmeithai khawsak harsa, BPL chhungkuate hnenah Pradhan Mantri Ujjwala Yojana hnuaiah a thlawnin gas connection an sem chhuak a. Nizan khan Raj Bhavan-ah Larsap, Lt. Gen. Nirbhay Sharma, CM, Pu Lal Thanhawla leh INTACH Mizoram Chapter hruaitute a kawm a. Vawiina Aizawl Tuikhuahtlanga Archaeological Survey of India, Aizawl Circle a hawn hnuah chawhnu lam khan Mizoram a chhuahsan leh ta a ni.