Argentina khawpui Buenos Aires-a 3rd Youth Olympics tun thla ni 6 a\anga ni 18 thlenga neiha weighlifting-a Men’s 62kg category-a Gold Medal latu, Jeremy Lalrinnunga leh Hockey-a Silver Medal latu, Lalremsiami te chu vawiina Aizawl an lo thlenin ropui taka lo dawnsawn an ni.

0
445
views

 

Sports and Youth Services Dept bultuma Synod Conference Center-a anmahni lawmna inkhawm buatsaihah chawimawina pek an ni a. He inkhawmah hian Principal Secretary Finance leh Home changtu Pu Lalnunmawia Chuaungo chu khuallian a ni. Thusawiin Pu Lalnunmawia chuan khawvel pumpuia inelna neiha hetiang chawimawina sang Mizoram infiammiten an dawng chu thil ropui leh chhinchhiah tlak a ni a ti.

Mizo tleirawl, kum 15 mi, Jeremy Lalrinnunga hian Men’s 62kg Category inelna snatch-ah kg 124 a chawi a, clean and jerk-ah kg 150 a chawi bawk a, a vaiin a rit chawi hi kg 274 a tling a ni. He category inelnaah hian Silver Medal latu, Turkey mi, Toptas Caner chuan a pumpuia belhkhawmin kg 263 a chawi ve thung a, an inthlauhna hi kg 11 a tling ni.

Jeremy Lalrinnunga hi Lalneihtluanga fapa a ni a, a pa hi tun hma lama boxer lo ni tawh, National Level-a gold medal pawh lo la tawh a ni a, Govt. Complex, Aizawl-ah an khawsa mek a ni. Jeremy Lalrinnunga hi kum 8 mi a nih lai kum 2011 khan Mizoram Weightlifting Academy-ah a lut a, a chak avangin Pune-a Army Boys School-ah Mizo naupang dang pahnih nen thawn an ni a, anni hian kum 2012 a\ang khan weightlifting-ah training neiin lehkha an zirtir bawk a ni. World Youth Weightlifting Championship-ah pawh Silver Medal pahnih a lo dawng tawh a, Commonwealth Youth Weightlifting Championship-ah pawh Gold Medal a lo dawng tawh bawk a ni. Prime Minister, Pu Narendra Modi pawhin hmu-in lawmpuina a hlan a ni.

3rd Youth Olympic Games-a Hockey-a Silver Medal latu, Lalremsiami hi Kolasib khaw mi a ni a, Kolasib-a talent hunt an neihah a tih \hat avangin Thenzawla Girls Hockey Training Academy-ah inkhelh zirtir a ni a, hetah hian a tih \hat avangin Delhi-a Girls Training Academy-ah lak leh a ni a, tun dinhmun hi a thleng ta a ni.