Arunachal Pradesh Chief Minister Pema Khandu-a’n state chhunga remna a awm leh theih nan pawl hrang hrang hruaitu, political party leh zirlai pawl hruaitute a kawm.

0
576
views

Khandu chuan state chhungah sumdawnna leh zirna in te inkhar anih bakah damdawi ina enkawl ngaite pawh enkawlna pek theih an nih loh thu sawiin, mipuiten eitur pawh an tla chham \an a ni a ti a, pawl hrang hrang te chu boruak muanawm a awm theihna tur leh nunphung pangaia mipuite an nun theihna tura thawhho puiah a sawm a ni. Permanent Residential Certificate chungchanga buaina chhuak chu a pawi a tih thu a sawi a, thi pathum chhungte chu a tawrhpui thu sawiin an chhungte hnenah cheng nuai 20 leh sorkar hna pek a tiam a, hliamte chu cheng nuai 10-a kan an nih tur thu a sawi bawk. Tharum thawhna thleng chhui chiang turin commissioner kaihhruai committee din a tur thu a sawi bawk a ni.

Puan tawh ang Arunachal Pradesh khua leh tui ni lo hnam 6 te hnena PRC pek chungchang Assembly-a pharh tum chu duh loin ni 4 bawr vel chhung mipuite’n lungawi lohna lantirin buaina nasa tak a chhuak a, lirthei leh building engemawzat, Deputy CM Chowna Mein chenna in tiama hal a ni a, police te’n mi 3 an kaphlum bawk a ni. Khandu chuan PRC chungchang hi JHPC ten report an siam theih nan chauh-a Assembly-a sawi ho tura phawrh tum a ni a ti a, bill emaw rawtna emaw a ni lo tih sawiin thil hriat sual vanga hetiang buaina a thleng hi pawi a tih thu a sawi a ni.