Association for Voluntary Blood Donation leh Mizoram State AIDS Control Society tangkawpin vawiin khan District Headquarter hrang hrangah Valentine’s Day puala thisen pek runpui an buatsaih

0
547
views

Association for Voluntary Blood Donation leh Mizoram State AIDS Control Society tangkawpin vawiin khan District Headquarter hrang hrangah Valentine’s Day puala thisen pek runpui an buatsaih a, mi 894-in thisen an pe. Aizawlah chuan Mac Donald Hill-a Govt. Mizo High School Hall-ah thinsen pek runpui hi Association for Voluntary Blood Donation, Mizoram State AIDS Control Society, Aizawl Civil Hospital leh Music Domain Mizoram tangho buatsaih a neih a ni a, a hawnna inkhawm tawi chhun dar 12-a neih hmanpuitu Cooperation Minister, Pi Vanlalawmpuii Chawngthu chuan, thisen thianghlim nei tura thalaite an invawn thianghlim a tul thu leh damlo mamawhte tana thisen pe theitu an nih angin Mizoramah HIV a darh zel loh nana hmalatu nih tum theuh turin thalaite chu a ngen a ni. MSACS Project Director, Dr. Lalmalsawmi Sailo pawhin, Mizo thalaite chu midang nun chhan nana thisen pek uar zel turin a fuih a, vawiina thisen petu zawng zawngte chu nunkawng dik lo zawh vanga natna tha lo darh zel tur ven kawngah hmalatu nih chhunzawm tum turin a chah a ni. Valentine’s Day puala thisenpek runpuiah hian thisen petute chu zaithiam leh milar dangten Rose par an lo pe zel a ni. Aizawl bakah hian District hrang hrangah pawh thisen pek runpui hi neih a ni a. Serchhipah chuan Mipa 43 leh Hmeichhia 35-in Unit 78 an pe a. Lunglei pawh Mipa 97 leh Hmeichhia 47, an vaiin mi 144-in thisen hi an pe a. Kolasib Mipa 32 leh Hmeichhia 29-in Unit 61, Champhaiah Mipa 70 leh Hmeichhia 29-in Unit 99, Lawngtlaiah mipa 36 leh Hmeichhi 12-in Unir 48 leh Siahaah Mipa 36 leh Hmeichhia 23-in Unit 59 an pe a ni. Valentine’s Day puala thisen pek runpui hi kum 2010 atanga neih tan a ni a, a tirah chuan Aizawlah chauh neih thin niin, kum 2013 atang khan Sistrict dangah pawh tih ve tan a ni a. Kum 2010 atanga nikum thleng khan Valentine’s Day puala thisen pek runpuiah thisen Uit 4,752 pek a ni tawh a ni. ————-

Nikum chhung khan Mizoramah TB vei mi 1,931 hmuhchhuah an ni. Vawiina Revised National TB Control Programme hnuaia hmalak dan leh hmachhawp hrang hrang thlir letna Aijal Club-a neihah TB vei thar zat hi sawi lan a ni a. Nikum chhung khan Mizoram pumah TB natna vei nia rinhleh endik 8,129 awmin, chung zinga 1,931 chuan TB an nei tih hmuhchhuah a ni a. Multi Drug Resistant (MDR-TB) vei rinhlelh endik 2,568 atangin MDR-TB vei mi 68 hmuh an ni a, HIV hrikpai, TB vei nia rinhleh endik 1,725 atangin mi 131-in TB an vei tih hmuhchhuah a ni. National Health Mission Director, Dr. Lalrozama kaihhruai sawihonaah hian TB enkawl dan chungchangah hmalakna thar pawh sawilan a ni a, TB vei ten MDR-TB an vei leh vei loh endikna Universal Drug Susceptibility Testing chu nikum September atang khan hman tan niin, hei hi TB vei hmuhchhuah thar apiangah endik nghal zel a ni. TB damdawi chawlhkar khata vawi thum ei thin chu Sorkar laipui thupek angin nitin ei tawh tura tih danglam a ni a. Kum 2025 hmaa ram chhung atang TB natna umbo a nih theih nana Sorkar laipuiin hma a lak meknaah TB veite chu tanpuina thla tin Rs. 500 pe tura ruahman mek a ni bawk.

Central TB Division atanga Mizoramin Medical Mobile Van a dawn chu Health Minister, Pu Lal Thanzar’an a hawng nghal a. He Mobile Van-ah hian TB natna hmuhchhuahna khawl pawimawh zawng zawng dah a ni a, thingtlang hmun kilkawr zawk leh hmanraw awm lohna hmunah pawh he Mobile Van hmang hian miin TB a vei leh vei loh awlsam zawka en theih a ni dawn a ni.