Augmentation of Water Supply and Construction of 37 MLD Water Treatment Plant siamna tur lung phum

0
803
views

North Eastern Region Capital Cities Development Investment Programme hnuaia Aizawl khawpuia chengte tui tam zawk pekna tur, Augmentation of Water Supply and Construction of 37 MLD Water Treatment Plant siamna tur lung vawiin khan UD&PA Minister, Pu Zodintluanga’n Tanhrila Mualkhang ramah a phum. He tuilakna tur hi SIPMIU hmalakna hnuaia kalpui tur a ni a, cheng vbch 156.67 senga nakkum June thla hmaa zawh hman tura tih a ni. Lungphum hawnna inkhawm Tanhril Mualkhang rama neiah UD&PA Minister chuan, Aizawl chawmtu tur tui lakna, Greater Aizawl Water Supply Augmentation Phase – III chu siam zawh a nih hunah chuan Aizawl khawpui mamawh khawp tui pek chhuah theih beisei a ni tih a sawi a. Tuna Aizawl chawmtu tui lak mekna Greater Aizawl Water Supply Scheme Phase-I chu kum 1988-a mi sing 8 chawm thei tura duan a nih thu leh Greater Aizawl Water Supply Scheme Phase-II pawh kum 2007-a mi nuai 2 vel chawm thei tura duan a nih thu sawiin, tunah hian Aizawl khawpui chhungah mi 3,39,000 vel awm anga chhut a nih avangin harsa tak chungin mipui tui mamawh hi phuhruk tum hram hram niin a sawi a. Pu Zodintluanga chuan, Tanhril Mualkhang rama tuilakna siam tur chu a pump chhuah kawngah harsatna a awm loh nan kawlphetha leh Diesel hmanga Pump theihna khawl 2 ve ve bun a nih tur thu leh kawlphetha pekna pawh a bika ruahman a nih tur thu a sawi a, tuna Dinhmunzawla Aizawl chawmtu tuilakna a\ang pawha tui pump chhuah reng a nih theih nan kawlphetha pekna tur siam mek a nih thu a sawi bawk. SIPMIU-in hmasawnna hna hrang hrang a thawh avanga khawpui chhung kawngpui laihchhiat lo sawisel tawk an awm \hin chu an inthlahrung hle tih Pu Zodintluanga chuan a sawi a, hmasawnna hna thawh a nih dawn chuan hetianga hmalak ngaih chang hi a awm \hin thu leh kawngpui an laihchhiat dawn pawhin a enkawltu PWD chu a theih ang angin an be rawn \hin niin a sawi a ni.

He inkhawm hi UD&PA Secretary, Dr. Vanlalramsanga’n a kaihruai a, SIPMIU Programme Director, Pu Valbuanga sawi danin, Augmentation of Water Supply & Construction of 37 MLD Water Treatment Plant hi nikum March thla a\ang khan \an a ni a. Setlak lui leh Tlawng lui infinnah tui lakna siam tur niin, Tanhril Mualkhang ramah hian tui sawngbawlna, Water Treatment Plant siam a ni dawn a. Heta \anga tui lakchhuah chu Laipuitlang Tuikhuahah pump chhuah a ni ang a, a inkar hi a hlat deuh avangin Luangmual Industrial Growth Centre-ah Intermediate Pumping Station siam a ni dawn a, tui lakna a\anga Laipuitlang tuikhuah thleng kilometre 14.75 a thui Pipe milimetre 711 a lian hman a ni dawn a. He hna hi Chennai-a MS Eco Protection Engineers Pvt., Ltd. leh Hyderabad-a MS AV Rambabu Infra Pvt., Ltd.-in an thawk dun dawn a ni. Augmentation of Water Supply and Construction of 37 MLD Water Treatment Plant hmang hian nitin tui litre maktaduai 37 pump chhuah theih a ni dawn a, tuna Greater Aizawl Water Supply Scheme Phase-I leh II nen \angkawpin kum 2033-a Aizawl khawpuia mi cheng 4,45,000 te nitin tui mamawh litre maktaduai 71 vel a pe thei dawn a ni.