Bairabi Zophai Assam ramri hrula Mizoram Police dahte chu hnuk kir rih dawn lo, a tul dan a zira awm zui tir zel an ni ang – Home Minister, Pu R. Lalzirliana

0
756
views

Home Minister, Pu R. Lalzirliana chuan Bairabi Zophai Assam ramri hrula Mizoram Police dahte chu hnuk kir rih lovin a \ul dan a zira awm zui tir zel an ni ang a ti. ZONET zawhna chhangin Home Minister chuan Mizoram leh Assam ramri buai chungchanga Union Home Secretary kaihhruaia Mizoram Chief Secretary leh Assam Chief Secretary inbiakna New Delhi-a tun thla ni 20, karleh Thawhlehnia neih turin thu tlukna an siam dan a zir leh thil an kalpui dan a zira Mizoram Police te hi ramri hrulah duty tir zel an ni dawn niin a sawi a ni. Hetihlai hian Bairabi-a ZONET palai sawi danin Mizoram Police te leh Assam Police te hi Zophai leilet ramah ve ve inngeih takin an awm ho a ni. Hetihlai hian ramri buai avanga tunkar tir lama boruak sang tak awm vanga Bairabi-a hnamdang hnathawka awm tlan chhia te chu an hnathawhna hmunah an let leh tawh a, rela buhfai phurh kudama hlang thla tu tur awm lo pawh tunah chuan an awm leh tawh a, hna engkim a pangngaiin a kal leh tawh a ni. Hetihlai hian Aizawl khawpuiah pawh petrol leh diesel hralh chhuah tur tlem vanga harsatna thleng chu a reh tawh a, Petrol Pump tinin a pangngaiin hna an thawk leh tawh a, Bazarah pawh thlai leh eitur thildang nidang ang bawkin a hmuh leh theih tawh a ni.