Bairabi Zophai leileta MZP-in Zofate Chawlhbuk sak that leh an tum vanga buaina chhuak palh thei veng turin sorkarin ruahmanna siam, Pu Lal Thanzara Zofate Chawlbuk hi sak a nih ngei sorkarin a duh tih a sawi

0
1037
views

Bairabi Zophai leileta MZP-in Zofate Chawlhbuk naktuk a\anga sak \hat leh an tum vanga buaina chhuak palh thei veng turin sorkarin ruahmanna a siam. Kolasib Bawrhsap, Pu R. Zarzosanga chuan ZONET zawhna chhangin buaina chhuah theihna tur hmun Zophai leiletah buaina chhuak palh thei veng turin ruahmanna siam niin a sawi a, Kolasib District SP, Pu Abishek Dhania pawhin helai hmunah hian Police tam tawk dah niin a sawi a, a \ul dan a zira inbuatsaih zui zel tur niin a sawi bawk. Hetihlai hian MZP hruaitute chuan ZONET zawhna chhangin Bairabi Zophaia Zofate Chawlhbuk an sakna hmun pangngai, Pu Ch. Chhunga leiletah Zofate Chawlhbuk sa \ha leh tur hian naktuk zingah Aizawl a\angin an thawk chhuak dawn tih an sawi a, an kalna turin vawiin tlai thleng khan bus pahnih an ruahman tawh a, anni bakah hian Mizoram hmun hrang hrang a\anga lo kal khawmte pawh mahni kalna tur intumin an lo kal mek tih leh heng mite hian naktukah anmahni an rawn zawm dawn tih an sawi bawk. Zawhna dang chhangin MZP General Secretary, Lalnunmawia Pautu chuan Chief Minister, Pu Lal Thanhawla’n vawiin chawhnua anmahni thil sawipui tura a kohnaah OB te an kal hman loh avangin Secretary te an tir tih a sawi a. An inbiakna ah hian thil thar a awm lem lo tih a sawi. Hetihlai hian Chief Minister, Pu Lal Thanhawla’n Union Home Minister, Pu Rajnath Singh-a hnenah nimin khan lehkha thawnin Mizo \halaite ramri-ah Assam Police-in an kah thu leh an chetdan chu a dem thu te, kum 1972-a Union Territory-a hlankai Mizoram chu kum 1987-ah State puitlingah hlankai a nih thu te, Assam nen ramri chungchangah inhriatthiam lohna a thlen zui thu te, kum 1995-96 chhung khan ramri chingfel tura hmalakna chu Chief Secretary Level thleng kalpui a nih hnuah Chief Minister pahnihte bawhzui tura dah a nih thu te, chu chu Assam Chief Minister-in a bawhzui loh avangin tihpuitlin a la nih loh thu te a thlen a, Union Home Minister chu he thilah hian inrawlh turin a ngen a ni. Union Home Minister hian he lehkha hi rawn chhang nghalin State pahnih Chief Secretary te chu tun thla ni 20, kar leh Thawhlehniah inbe tura a tih thu Mizoram sorkar an rawn hriattir leh tawh tih Home Minister Pu R Lalzirlaia’n Zonet a hrilh a. He thu hi MZP hruaitute pawh hriattir nghal an ni tawh a, chuvangin buaina tipunlun lo zawnga MZP hruaitute chu an kal theih a duh thu Home Minister hian a sawi.

Vawiina Zonet Reporter zawhna chhangin Health Minister Pu Lal Thanzara chuan MZP ten sak an tum, Zofate Chawlbuk hi sak a nih ngei sorkarin a duh tih a sawi bawk.