BJP Mizoram Pradesh buatsaihin tun thla ni 16-a New Delhi All India Institute of Medical Sciences-a thi Prime Minister hlui, Atal Bihari Vajpayee sunna hun hnuhnung chu vawiin khan neih a ni a. A halna vap thenkhat chu Sairang bula Tlawngah paih a ni.

0
418
views

 

A sunna inkhawm Upper Republic-a BJP Party Pisa-a neih hi Mizoram Pradesh President, Prof. JV Hluna’n a kaihruai a, Atal Bihari Vajpayee chanchin sawitu, BJP General Secretary (Organisation), Pu Vanlalhmuaka chuan, he thihna hi ram pum tan channa lian tham a tling tih sawiin, a bikin BJP tan phei chuan a uihawm tak zet tih a sawi. Atal Bihari Vajpayee chu BJP dintu zinga pawimawh tak a ni tih sawiin, Pu Vanlalhmuaka chuan, amah kha mi dik leh taima tak a ni a, ram tana thihthlenga nun hlantu nupui nei loa ram tana inpe pumhlum thak a nihnate chu a chhuanawm hle a ni, a ti a. Mizo Politiciante pawhin a rinawmna te, a huaisenna leh a dikna te chu entawn se, ram leh hnam tan pawh hian hmasawnna dik a thlen ngei a beisei tih a sawi.

He inkhawmah hian Congress aiawhin Media Department Secretary, Pu David M. Thanglina leh Prism aiawhin General Secretary, Pu Lalrinzuala Chawngthu pawhin thu an sawi a. Prime Minister, Narendra Modi-a’n State hrang hranga BJP President-te hena Atal Bihari Vajpayee vap hawn tur leh an State-a tidarh tura a tih angin BJP Mizoram Pradesh President, Prof. JV. Hluna’n a halna vap a lo hawn chu vawiin khan Hindu puithiam kutah hlanin a vap hi Tlawngah paih a ni.