BJP Mizoram Pradesh President, Prof. JV Hluna chuan Mizoram mipuiten an chanvo dik tak an chan a, rorelna tha a awm theih nan Mizoram BJP chu din niin a sawi a. He thu hi Zemabawk Lungbial venga an party inkhawmah sawiin, ram puma rorelna tha siam chu BJP thil tum leh Prime Minister, Pu Narendra Modi-a thupui a ni tih a sawi. Prof. JV Hluna chuan, BJP sorkar chu langtlang Sorkar a nih bakah a taka hlemhletna do ngam a ni tih sawiin BJP-in thuneihna a chang a nih chuan Mizorama Sorkar hnathawk thenkhat eirute pawhin eiruk an chhunzawm ngam tawh dawn lo niin a sawi a. Tunah chuan kawng engkimah Minister leh Sorkar hnathawkte an inthurual emaw tih mai turin kawng siam a tha thei lova, insak a tha tawk lova, mipui hamthatna tur hrang hrangah sum sen dan leh hnathawh a inmil loh thin nia sawiin, hei aia thil tha zawk hi mipuiin an mamawh niin a sawi a ni.
BJP North East Co-ordinator, Pu Sundar Pal pawhin Mizoram hmun hrang hrang a fankualna atangin Congress Sorkar-in mipui mamawh a ngaihthahzia a hmu niin a sawi a, kawng tha lai awm mang lote chu thil zahthlak tawp nia a ngaih thu a sawi a ni. Pu Sundar Pal chuan, Kristian-te tana BJP hlauhawm anga sawi chu Congress thu dik lo thehdarh niin a sawi a, BJP-ah hian Kristian MLA leh Minister engemawzat an awm a, Hindu tam tak zingah Isua be thin an awm thu a sawi bawk. He inkhawm hi Lungbial Unit President, Pu Vanlalhruaia’n a kaihruai a ni.
