BJP Mizoram Pradesh President Prof. JV Hluna’n Chakma Candidate an neih dawn leh dawn loh an la sawi thei lo tih a sawi

0
347
views

BJP Mizoram Pradesh President, Prof. JV Hluna’n kumina Assembly inthlanpui neih turah an Party-in Chakma Candidate a neih dawn leh dawn loh an la sawi thei lo tih a sawi. Vawiina an party office-a thuthar lakhawmtute a kawmnaah he thu hi a sawi a. Assembly Inthlanpui neih tur atan thla 10 vel hun a la awm avangin tun dinhmunah chuan Candidate dah dan tur pawh an la tih chhian theih loh thu a sawi a, Chakma candidate nei lo tura Joint NGO Co-ordination Committee ngenna chungchangah, an neih tur leh tur loh-ah thuthlukna an la siam rih lo tih a sawi a, Mizorama bial awm zawng zawnga bial 40-a Candidate dah vek tur erawh chuan chak takin hma an la mek niin a sawi. Prof. JV Hluna chuan, Assembly inthlanpui hmachhawn mek Meghalaya leh Tripura-ah BJP-in nasa takin hma a sawn niin a sawi a. Heng State pahnih-ah hian tun hnaiah BJP tan Campaign-a an chhuah thu sawiin Zohnahthlak hnam hrang hrangte pawhin an hmalakna chu an thlawp niin a sawi a, Shillong-a an Campaign tumin, Zohnahthlakten Congress kaihhruai Meghalaya Sorkar hnuaiah an chep zia an lo hrilh nia sawiin, an in leh lo pawh an thawm that theih loh thu an lo thlen niin a sawi a, hei hi BJP hotute pawhin mak an ti hle nia sawiin, BJP-in thuneihna a chang a nih chuan heng thil dik lo chi hrang hrang te hi siam that a nih tur thu an hrilh niin a sawi a. Tripura-ah pawh hun rei tak CPI kaihhruai Sorkar an hrawn tawh avanga mipuite chu an rethei tih pawh hre lo khawpin an rethei niin a sawi a, kuthnathawktute pawhin Minimum Wages angin hlawh an la lova, Sorkar laipui hnathawkten Pay 7-na anga hlawh an lak tawh laiin, Tripura Sorkar hnuaia hnathawkte chuan Pay 5-na hlawh pawh an la la phak lo nia sawiin, Tripura-ah hian Tribal leh Kristian-te an chep hle a ni a ti a, hei hi mipuiin an duh loh avangin BJP chuan Sorkar thar a siam ngei dawn niin a sawi. Tun hnaia Assam Chief Minister, Pu Sarbananda Sonawal nen an inkawmnaah Guwahati-a Mizoram House kawtah mipui him zawk nan Fly Over Bridge siam turin a ngen tih Prof JV Hluna chuan sawiin, hei hi bawhzui a nih tur thu a lo hrilh niin a sawi a. Kum 2014-a Parliament inthlanpui neih tuma BJP-in Defence University din a tum thu Manifesto-a a telh chu tihhlawhtling tur leh Vairengtea Counter-Insurgency and Jungle Warfare School (CIJWS) chu tichangtlung a, Defence University-a hlangkai tura rawtna Sorkar laipui hotute hnena an thlen tawh thu pawh Prof. JV Hluna chuan a sawi bawk.