BJP thawhpui Janata Dal United JD(U) party chuan Rajya Sabha-ah Citizenship Amendment Bill, 2017 dodal an tum thu leh Assam lama he Bill duhlohna lantirtute \awiawm turin an mi leh sa an thawn dawn tih an sawi.

0
2794
views

JD(U) thupuangtu KC Tyagi chuan Lok Sabha lama he bill chungchanga vote lak a nih laia Congress MP-te lungawiloa rorelna in an chhuahsan chu bill hi an thlawp tih an lantirna nia an ngaih thu leh an party chuan Rajya Sabha-ah bill hi an dodal tur thu a sawi a ni.

Puan tawh angin he bill vang hian Assam-a BJP sangawizawnpui Asom Gana Parishad chuan BJP nena an inkungkaihna an lo titawp tawh a, hei vang hian JDU thutlukna hian ngaihven a hlawh hle a, BJP lam chuan an thawhhona a buai phah an rin loh thu an sawi a, tun thla ni 27 hian an party vice-president Prashant Kishor te chuan Assam lama he Bill duhlohna lantirtute \awiawm turin an Guwahati pan an tum thu a sawi bawk ani.

Assam leh hmarchhak state dangte chuan Citizenship Amendment Bill, 2017 hian state khua leh tuite nekchepa an awm a, humhalh an ni lo ang tih an hlauh vangin an dodal nasa hle a, Nagaland CM Neiphiu Rio erawh chuan Nagaland chu Article 371(A) leh Inner Line Permit-in a humhim avangin, he bill hian a tibuai ve lo dawn lo niin a sawi ve thung a, State Cabinet-in Article 371(A) leh 1873-a Bengal Eastern Frontier Regulation (BEFR) hnuaia ILP dante chu khauh zawka kenkawh dan an ngaihtuah mek thu leh, sorkar laipuiin hmarchhak khua leh tui diktakte chanpual chu humhalh a rin thu te leh hmarchhak state-te chu inberawn tawn tura a duh thu a sawi bawk a ni.

Puan tawh angin tun thla ni 8 khan Citizenship Ammendment Bill, 2017 hi Lok Sabha-ah pass a lo ni tawh a, he bill hnuaiah hian December 3, 2014 hma lama Hindu, Sikh, Buddhist, Jain, Parsi, Christian mi Afghanistan, Bangladesh leh Pakistan a\anga India rama lo lutte chuan ram khua leh tui nihna an nei thei dawn a ni.