British tana enthlatu hlui pakhat nikhaw hre lo in tlu, damdawiinah enkawl

British tana enthlatu hlui pakhat, Wiltshire Salisbury-a nikhaw hreloa a tluk chhan chu engmah a la hriat loh chu Russia in a sawi a, hetihrual hian Police te thil chhuina erawh theihpatawpa tanpui a inpeih tih a sawi thung. Sergei Skripal kum 66 mi hi kum 2010 khan enthlatu inthlengtawnna hmangin UK-ah a lut a, amah bakah kum 33 mi hmeichhe pakhat te chu nikhehrelova tluin na takin an dam lo mek a, UK Police te chuan engvanga hetianga awm thut hi nge an nih tih leh tur hmanga hrai an ni em tih an chhui chiang mek a, an pahnih hian dawr lian pakhat bul, thutthlengsei ah nikhawhrelovin niminpiah khan hmuh an ni. Russia President Vladimir Putin tana thupuangtu Dmitry Peskov chuan police te thil chhuina kawngah puih an inhuam reng tih chanchinbumite hmaah a sawi a, he thil thleng hi pawi an tih thu sawiin, engvanga hetianga dam lo thut hi nge an nih an hriat loh thu a sawi. Wiltshire Police te chuan heng mi pahnihte hian an taksa pawn lamah hliam hmuh tur an nei lo tih an sawi a, a bulhnaia Zizzi restaurant chu fimkhur thu hlaah Police te hian an khar sak nghal a, Temporary Assistant Chief Constable Craig Holden chuan enge anih hriat loh tur chikhat an taksa-a awm tireh tura enkawl mek an nih thu a sawi. Sergei Skripal-a hi Russia Military intelligence officer hlui a ni a, Russia inteligence agent te nihna kimchang UK Secret Intelligence Service M16 te hnena rawlhru-ah puhin Russia chuan kum 13 zet lunginah a lo khung tawh a ni.