California chhim lamah ruah sur nasa, chirh tawlh vangin mi 13 thi

0
424
views

US-a California chhim lam, Santa Barbara County-ah tui lian leh chirh tawlh avangin nimin khan mi 13 an thi. Santa Barbara-ah hian nimin khan ruah a sur nasa hle a, a mi chengte pawh inthiar chhuak tura hriattir an ni nain, mi za zela 15 vel chauhin sorkar thu hi an zawm niin Fire Department chuan a sawi a, ui fing leh helicopter hmangin chhanchhuah hna thawh mek a nih thu leh mi eng emaw zat chhanchhuah an nih tawh thu an sawi. Chirh tawlh hian chenna in a tichhe nasa hle a, thing kung leh car-te a hnawl nasat avangin, chhiatna a thleng nasa lehzual nia hriat a ni a, kum 2005 khan California-ah hian chirh tawlh avangin mi 10 an lo thi tawh a, thla hmasa lama khaw lum avanga nasa taka ram a kan vang khan, chirh tawlh a tam lehzual hle a ni. Tuna he thil thlenna hi Pacific tuifinriat leh Los Padres National Forest inkar, Los Angeles hmar lam mel 110 velah a ni a, Santa Barbara khawpui pawna Montecito leh Carpenteria-a awmte chu a tuar nasa ber an ni. Santa Barbara County Sheriff, Bill Brown-a chuan vanduaina an tawh chu Indopui 1-na sulhnu ang mai niin a sawi a, in chhia hi hmuh belh leh dap chhunzawm zel a la nih avangin, thi hi an la pun rin a ni.