He thu hi vawiin a Central YMA hnuaia SRS member leh an chhungte leh Central YMA hotute inkawmkhawmnaa sawiin Pu Vanlalruata chuan, Mizo \halai tamtakin nunna an chan phahna ruihhlo leh zu chu YMA chuan a vei hle tih a sawi a, hemi avang hian kum 2014 a YMA General Conference-ah ruihhlo do chu kumpuan atan hman a ni ta niin a sawi. Pu Vanlalruata chuan, mi\henkhatin YMA in ruihhlo a do chu an tih loh tur ti a ngai an awm thu te, a man tutur Sorkar a awm tia YMA hmalakna dem an awm thu leh YMA hruaitute khenbeh hial chak an awm nia sawiin Pu Vanlalruata chuan, ruihhlo do chu an tihtur a ni lo tih an hriat thu a sawi a, hetirual hian ruihhlo chu Mizo \halai tam tak an thihphah avang leh ram leh hnamin a tawrh mek avangin an enliam ve mai theih loh avangin a do kawngah hma an la zawk a ni a ti. Pu Vanlalruata chuan ruihhlo do beihpui an thlak chu Pathian in a remti a nih a rinthu sawiin an hmalakna chu nasa takin mal a sawm niin a sawi a, ruihhlo pawh a tlem phah thu te, thi pawh an tlem phah nia a hriat thu a sawi a ni. Pu Vanlalruata chuan, YMA in ruihhlo do a chawlhsan lailawk laiin nasa takin ruihhlo a pung niin a sawi a, Vanapa Hall bul vela ruihhlo zuar leh ti \hin ngampa taka an awm \hin lai khan mipuiin hmala tura an auh hmasak chu SRS a ni fo niin a sawi a, SRS te chuan kumkar luhchhuakin ruihhlo an do \hin a hemi avang hian ruihhlo vang Mizoram dinhmun chhiatzia pawh an hrechiang hle niin a sawi a ni.
SRS batch 8 na Secretary Report in a tarlan danin nikum December ni 20 a\anga vawiin thleng khan ruihhlo an man te chu Heroin hawng 90, Cane 873, Bagacab 472, Tramadole mum 3015, bangladesh a tawlhluh tur Morphine ample 985, Metamphetamine mum 2424, Cytropum mum 370 ganja Kg 1 bakah pawisalem Rs 647,500 a ni a. an thil man zawng zawng hlut zawng hi cheng nuai 60 chuang hu a ni. Ruihhlo leh thildang an man kaihhnawihah hian mihring 570 thu zawhfiah an ni a, Home-a dah mi 65, Excise kutah mi 6 hlan an ni a, Police kutah mi 15 hlan an ni bawk.
Inkhawm hi kumpuan Chairman Pu R Lalngheta’n a kaihruai a ni.
