Chapchar Kût 2018 Mizoram pumah hlim takin hman a ni

0
564
views

Mizote Kut ropui ber, Chapchar Kut chu vawiin khan Mizo hnam ziarang pholang thei thil chi hrang hrang nen Mizoram pumah hlim taka hman a ni. Kut hmanna pui ber Aizawlah chuan Home Minister, Pu R. Lalzirliana chu Kut pa a ni a, Transport Minister Pu John Rotuangliana chu kut thlengtu a ni. Chapchar kut thuchah a sawiah kut pa, Pu R. Lalzirliana chuan, kumina Chapchar Kut thupui, ‘sem sem dam dam, ei bil thi thi’ tih chu pi leh pute atanga Mizo nun zemawi inzirtirna pawimawh tak a nih thu sawiin, he thu awmze nei tak hian mahni hmasial leh midang ngaihsakna tel lek lova nun hman chu damrei lohna thlentu a ni tih a tilang chiang hle a ni, a ti. Pu R. Lalzirliana chuan, mihring nun tehna chu an hausak dan te, an in leh lo that leh that loh te leh an thil tihtheih dan lam a ni lo a, midangte tana inpekna tluka ropui a awm lo tih kan hriat a ngai a ni a ti a, midang ngaihtuahna tel lova, mahni tanghma hai ringawta nun hmang thinte chu mi piangsual an ni ber tih sawiin, mi rilru hrisel chuan midang an dah pawimawh thin tih a sawi. Zirthiamna leh hriatna chu mahnia pumbilh tum chi a ni lo tih sawiin Home Minister chuan, tumah thiam sa leh hre sa an awm loh avangin inpuih tawn tum tur a ni a, Sorkar hna, Kohhran, chhungkua leh mimal thila midangten an hre ve ang tih hlaua zep tlat chu thil tha a ni lova, tui tling luan chhuahna tur nei lo chu a bawlhhlawh mai thin angin, mihring nunah pawh midang tana luang chhuak lo chu mi hnawksak an ni mai thin a ni a ti. Pu R. Lalzirliana chuan, Hnama chiang a piangin mahni hnam nunphung leh khawsak dan an ngaisang thiam nia sawiin, mahni hnam nun aia hnamdang nun ngaisangtu chu hnam boral an ni thuai thin tih a sawi a. Chapchar Kut hmangtu zawng zawng chu Mizo nihna zahpui lova, khawvel hriatah a tha zawnga pho chhuah a nih theih nana hmala turin a sawm a ni.

Kut thlengtu, Transport Minister Pu John Rotluangliana pawhin, Chapchar kut chu inremna leh induhsakna kut a nih angin mi tinte chu inrem taka awm turin a chah a. Inlawmna thu sawitu, Central YMA President, Pu Vanlalruata chuan, Chapchar Kut thupui chu, ‘sem sem dam dam, eibil thi thi’ tih a nih angin Kut chhimtute chu vawiin atanga an thenawm khawveng leh midangte nena inlaichinna tha siam tan tum theuh turin a chah a. Kut chhimtute chu chawhmeh insuah ching thar turin a chah a ni. Pu Vanlalruata chuan Retailler-in buhfai a sem te a buk dik tak a nih theih na tur leh Gas hralh turte pawhin a buk dik tak chauh an hralh theih nana mahni hmazawn theuha tanla turin mipuite a chah bawk. Aizawla Chapchar kut hmannaah hian khuallian atana sawm Myanmar-a Chin State Chief Minister, Pu Salai Lian Luai leh kut thlengtu atana beisei Chief Minister, Pu Lal Thanhawla te chu rokhawlhna avangin an tel thei lova, heti chung hian Minister, MLA, sorkar mipawimawh leh mipui thahnem tak an tel a. Central YMA in Cheraw kanpui, Costume Prade, mizawn inchuh leh sarlamkai a entir a. Mizo hnam zai chi hrang hrang leh inchei dan chi hrang hrang te entir a ni bawk. Chapchar Kut hi Aizawlah chuan nimin atang khan hman tan a ni a, kut pual hian Vanapa Hall-ah thlalak entirna, Photo Exhibition-te, Assembly Annexe Building-ah pangpar entirna, Flower Show cum Fair te, Lammual sirah Food Fest, Handloom Show leh Museum Exhibition te buatsaih a ni bawk. Nimin atanga Chapchar Kut hmanna hi Zonet chuan Zawlbuk leh Zonet HD Channel-ah te Live-in a tichhuak a. Zonet Youtube Channel ah pawh live in a pe bawk.

—————————————–

Vawiina Lammuala Chapchar Kut hmannaah mipui lut chhuak an tam avangin Aizawl khawpuiah Traffic a jam nasa hle. Kan Corr. in khawpui chhung a fankualnaah nidang zawng aiin mipui kea kal hmuh tur an tam a, lirthei tlan pawh a tam zawk bawk a, sorkarin lirthei hunna atana a siamah pawh hunna inchan lovin hmun awl remchanga lirthei dah tam tak hmuh tur a awm bawk a ni. Lirthei khalhtu thenkhat sawi danin Chanmari atanga Dawrpui inkarah pawh darkar 1 chuang hun hman a ngai a, traffic jam avangin hun an khawhral nasa hle. Khawpui chhunga mipui veivak an tam avangin mihring ke kalna siamah te pawh an tawt hle a, chawhnu lama Chapchar kut hmangtu hawlam mipui tam takin ke-a kawngpui an zawh avangin lirthei tan tlan hleih theih lovin a awm a, hun engemawchen chu eng hawi zawng mahin lirthei a tlan thei lo nghe nghe a ni. Hemi chungchanga ZONET zawhna chhangin Aizawl Traffic hotute chuan, nidang ang tho in duty an indah tih an sawi a, hetihrual hian Chapchar kut hmangtu an tam avangin nidang ai chuan kawngpui a tawt tih an sawi a, Aizawl chhim leh hmar inkal pawhna kawngpui pawhtu kawngpui dangah erawh lirthei a tawt lutuk lo a ni. Vawiin thlai lam thleng kha chuan traffic dan bawhchhiatna lian tham emaw, ruih vanga harsatna lian tham emaw thleng a awm rih lo tih Traffic Police te chuan an sawi.
———

Mipui nawrna vang chauha kawng siam tumah MNF Vice President Dr R Lalthangliana’n Mizoram Sorkar a puh. Vawiina Kawrthah a an party SEDP zirhonaah Dr R Lalthangliana chuan kum 10 dawn Congress in ro an rel chhungin kawng siam an la harsat hle niin a sawi a, mipui, NGO leh eptu party hrang hrang ten nasa taka an sawi sel avang leh total Band hial te an siam hnuah tun hnaiah kawng siam an tan ve ta chauh niin a sawi a, inthlanpui a hnaih tawh avanga kawng langsar lai lai siamah sorkar a puh bawk. Dr R Lalthangliana chuan kawng siam mek te pawh a siamdan phung a tha lo hle nia sawiin, fur khat pawh a daih a rinawm loh niin a sawi a, ram hmangaihtu dik hnathawh dan a ni lo niin a sawi. Kawng siam hna thawh theih loh chhan nia sorkarin a sawi Fur ruahtui tlak tam vang tih chu chhuanlam tling a ni lo niin Dr R Lalthangliana chuan a sawi bawk a, thal lai hun tam tak a awm nia sawiin kawng chhiat thua mawh la ngam ngai lovah sorkar a puh bawk a, an party in thuneihna an chan chuan, an sorkar lai ang bawkin kawngpui tha leh nuam mipuite an pe leh dawn niin a sawi a, SEDP hmangin mipui mamawh leh indodelhna tur bakah ram hmasawnna hna nasa tak an thlen dawn niin a sawi. SEDP zirhona hi Hachhek South Block MNF President Pu C.Hmingthankima’n a kaihruai a ni.
—————–

District Hqrs. hrang hrangah pawh vawiin khan mipuite Chapchar Kut hlim takin an hmang. Siahaah chuan Vaihpi-a District Playground-ah hman a ni a, hetah hian Mara Autonomous District Council Chief Executive Member, Pu N. Zakhai chu kutpa a ni a, DRDA Project Director, Pu VL Hruaizela Khiangte chuan kut hi a thleng a ni. Group YMA Zaipawlin hawnna hla an sak hnuah Pu C. Sangmanga’n hlado a chham a, hemi hnu hian hmanlai pi leh pute hunlai atanga Mizo nunzia tilang thei thil chi hrang hrang, Pawnto, hnam inchei, hnam lam entir a nih bakah zaithiamte an zai a, Miss Chapchar Kut thlan a nih bakah mipa naupang leh hmeichhe naupang kum 7 hnuai lam, Mizo incheia inchei nalh ber thlan a ni bawk.
————-

Lungleiah chuan Chapchar Kut hi Thuamluaia Mualah Pu Joseph Lalhimpuia, MLA-in a thleng a, hetah hian Kutnu chu Lunglei Bawrhsap, Pi Lalzarmawii a ni. Thusawiin Pu Joseph Lalhimpuia chuan tun hmalama pi leh pute hunlai chuan pasaltha te chu ral leh sahrang hmaa tlan ngai lo leh sa kap thei te an ni a, hun danglam chho zelah tunah erawh chuan kan pasaltha te chu lehkhathiam, mi rinawm leh tangkai, All India Level-a hna sang chi hrang hranga tling phakte an ni ta a, hetiang mite hi sorkar chuan chawimawiin anmahni tihphurna, cash incentive pawh cheng nuai khat thlengin a pe dawn niina sawi a ni. He Kutah hian Mizo hnam lam chi hrang hrang leh pi leh pute hunlaia an thil chin thenkhat an entir a, chung zingah chuan mizawn inchuh pawh a tel a ni.
——————

Serchhipah chuan Chapchar Kut hi Leisekawt khelmualah hman a ni a, Sub-Headquarters YMA President, Pu R. Sanghmingthanga’n a thleng a, hetah hian Serchhip Bawrhsap, Pi Sangchhin Chinzah chu Kutnu a ni. Thusawiin Kut thlengtu Pu R. Sanghmingthanga chuan pi leh pute hunlaia a hlim thei ang bera he ni an lo hman thin thu te, tumah inhau lo leh intibuai lova an hman thin thu te sawiin, chutianga hmang tur chuan mipuite a duhsakna a hlan a ni.
Kutnu, Pi Sangchhin Chinzah pawhin hnamzia hi rohlu, tu leh fate hlan chhawn zel tur leh chhawm nun zel tur a ni tih sawiin, Mizo hnam nun leh ziarang chi hrang hrangte chu humhalha vawn nun zel a tul thu a sawi a ni. Kutah hian Mizo hnam lam chi hrang hrangte, Darbu tum leh Chhawnghnawt te entir a ni a, zaithiamte an zai bakah Kut miss pawh thlan a ni.
——————–

Champhaiah chuan Kahrawt Veng khelmualah Chapchar Kut hi Additional DC, Pi Lalsangpuii Hmarin a thleng a, YMA hruaitu hlun, Pu H. Lianruma chu Kutpa a ni. Thusawiin Kut thlengtu, Pi Lalsangpuii Hmar chuan Chapchar Kut chu changkanna leh hmasawnna nasa tak neih hnuah pawh chuai chuang lova hman chhoh zel a ni chu thil lawmawm niin a sawi a, mahni hnam nun ngaihsan leh vawn nun chu hnam changkang te pawhin an ngaihpawimawh niin a sawi a ni. He Kutah hian Mizo hnam lam chi hrang hrang, Arsi lam, Dar lam, Buhtuh lam, Par lam, Chheih lam, Chawnglaizawn, Sarlamkai, Cheraw ‘Buhza-aih’, Kantluang, Zonunpar leh Zialung Cheraw te entir a nih bakah zaithiamte an zai a, Chapchar Kut Miss thlan a ni bawk.
——————-

Mamitah chuan GSA Playground-ah Chapchar Kut hman a ni a, hetah hian Mamit Bawrhsap, Pi Lalbiaksangi, Kutnu ni bawk chuan Kut hmangtu mipuite chu duhsakna a hlan a, Mizo hnam nun humhalha vawngnung zel turin a fuih bawk a ni. Kut hmanna inkhawm, Sub Hqrs. YMA President, Pu Zatluanga Sailo kaihhruaiah hian YMA Branch hrang hrangten Mizo infiamna, Kalchhet, Insuknawr, Saihruipawh leh Inkawibahte bakah Mizo hnam lam chi hrang hrang an entir bawk a ni.
——————-

Kolasib-ah chuan Chapchar Kut hi Tumpui Field-ah bialtu MLA, Pu PC Zoramsangliana’n a thleng a, hetah hian Agriculture Minister, Pu KS Thanga chu Kutpa a ni. He Kutah hian hnam lam chi hrang hrang leh pi leh pute hunlaia an thil chin thin thenkhat entir a nih bakah zaithiamte pawh an zai a ni. Vairengtea Counter Insurgency & Jungle Warefare School-ah pawh Chapchar Kut hi UD&PA Minister, Pu Zodintluanga hovin hman a ni a, hetah hian Kut thlengtu chu bialtu MLA, Pu K. Lalrinthanga a ni a, Kut chhimtu sipai ho zingah hian Uganda atanga training-a lo kal sipai 20 rual pawh an tel a ni.