Chapchar Kût Aizawlah hmang tan

0
827
views

Mizote kut zinga ropui ber, Chapchar kut chu vawiin atang khan Aizawlah hman tan a ni a. Lammuala Chapchar Kut hmannaah hian Art and Culture Minister, Pu R. Romawia chu kut pa a ni a, Art and Culture Director, Pu R. Hmingthanzuala chu kut thlengtu a ni. Kut pa, Art and Culture Minister, R Romawia chuan, kumina Chapchar Kut thupui chu ‘sem sem dam dam, eibil thi thi’ tih a nih angin mitinte chu midang tana malsawmna leh tanpui nih tum theuh turin a chah a. Mizoten pi leh pute atanga kan rochun aia upa zah leh hnam nun zemawi hrang hrangte chhawm nun a nih chhung chuan Mizo hnam a thang zel ang a, chuti ni lova aia upa zahna leh hnam nun zemawi tlansan a, ram dang leh hnam dangte tihdan kan entawn rualin Mizo hnam chu a boral ve nghal ang tih a hlauhawm a ni, a ti. Pu R. Romawia chuan, Mizo mipuite chu hnam-a chiang leh zual tura chahin, Mizoram hmun hrang hranga naktuka Chapchar Kut lawmna leh a kharna inkhawmah mipui a tam thei ang ber kal turin a sawm bawk.

Kut thlengtu, Art and Culture Director, Pu R Hmingthanzuala pawhin, chapchar kut chu lawmna kut a nih angin hlim taka kut hmang tur leh, inremna leh lungrualna kut a nih anga inrem tlang leh lungrual taka hmang turin mipuite a chah a. Inlawmna thu sawitu Central YMA General Secretary, Pu Lalhmachhuan chuan, Chapchar kut chu lungngaihna ata hlimna, tamna ata puarna kut a nih angin Mizote tan a hlu bik tih sawiin, he kut hi Zofate inpumkhatna kawng zawh tirtu ni thei se a duh thu a sawi a. Zofate chu Mizoramah chauh an cheng lo tih sawiin, khawvel hmun hrang hranga zohnahthlak awmten Mizoram chu an ngaih hlut berte zinga mi a ni a ti. Chapchar Kut ni khatnaah hian Organizing Committee-in Kut hmang tura a sawm Myanmar, Bangladesh, Manipur, Meghalaya, Assam leh Tripura atanga lo kalten thu an sawi hlawm a, Mizo hnam lam leh infiamna hrang hrang entir a ni.

Chapchar Kut pual hian Vanapa Hall-ah thlalak entirna, Photo Exhibition-te, Assembly Annexe Building-ah pangpar entirna, Flower Show cum Fair te pawh buatsaih a nih bakah, Lammual sirah Food Fest, Handloom Show leh Museum Exhibition te buatsaih a ni bawk. Chapchar Kut lawmna pui ber chu naktuk hian Mizoram hmun hrang hrangah neih a ni dawn a, Aizawlah chuan Kut Pa atana sawm Myanmar Chin State Chief Minister Pu Salai Lian Luai leh Kut thlengtu tura ruahman Chief Minister Pu Lal Thanhawla te an remchan dawn loh avangin Home Minister, R. Lalzirliana chu kut pa a ni ang a, Transport Minister, Pu John Rotluangliana chu Kut thlengtu a ni ang. Zonet chuan chapchar kut lawmna hi live in a pe chhuak a, Zawlbuk channel, Zonet HD leh Zonet Youtube channel ah te en theih a ni.