Vawiina chanchinbumi \henkhat leh chanchinbu-a thuziak \hin mi \henkhat a kawmnaah Ashish Kundra chuan Tripura Camp-a awm Tuikuk te avanga inthlan dawn hnaiha harsatna thleng \hin chu pawi a tih thu a sawi a, tun \um Lok Sabha inthlanna neih turah pawh heng Tuikuk te tana Kanhmuna Special Polling Station siam sak chu Mizorama tlawmngai pawl ten an dodal thu amah pawh an hriattir tawh tih sawiin, NGO-te thil ngaihmawh chu a hriatthiampui thu a sawi a, hetihlai hian inthlan boycott ang chi zawnga hmalak erawh a chinfelna tur nia a hriat loh thu sawiin, boruak muanawm tak hnuaia hlawhtling taka inthlanna buatsaih chu mipui rorelna democracy tih ngheh zelna tura thil \ul a ni a ti.
CEO Ashish Kundra chuan nikum kum tawpa Assembly inthlanpui neih \uma Kanhmun-a vote thlak tir an nih khan boruak muanawm tak hnuaiah Tuikuk ten vote an thlak a, khawtlang hruaitu leh YMA te pawhin a \ul apiang buaipuiin, an ei leh in tur thlengin an lo buatsaih sak a, a hnua electoral roll siam\hat hna thawh chhunzawmnaah pawh Tuikuk sang chuang chu boruak muanawm tak hnuaiah Kanhmunah bawk an inlan leh a, khang thilte khan Mizoram mipuite a\anga anmahni tih \haihna lam chi a awm lo tih a lantir a, hei hi NGO te thil duh ber nawr zuina atan pawh thil \angkai tak a ni zawk dawn a ni a ti a, Tuikuk te chungchanga buaina chu awmze neia chinfel zui ngai nia a hriat thu sawiin, inthlan boycott erawh a chinfelna ni lova a hriat thu a sawi.
Puan tawh \hin angin Mizorama tlawmngai pawl hrang hrang intelkhawmna NGO Coordination Committee chuan Tripura Camp-a awm mek Tuikuk te a huhova Kanhmuna vote thlak tir tum an nih chuan Lok Sabha inthlanna boycot an tum thu an lo puang tawh a, hetihlai hian Election Commission chuan nikum kum tawpa Assembly inthlanna neih \um ang tho khan Lok Sabha inthlanna neih turah pawh Tuikuk te tan Kanhmunah Special Polling Station siam turin Mizorama inthlan buaipuitute a hriattir thung a ni.
