Union Minister chuan Pu Zoramthanga ngenna chu bawhzui a nih tur thu leh thil awmdan enfiah hmasak a ngaih dawn thu a sawi a, buhfai chhekkhawlna tura kudam tam zawk, FCI leh Mizoram sorkar hnuaia Food, Civil, Supplies & Consumer Affairs Deptt.-in an mamawh thu pawh a hrilh a, sum awm ang ang hmanga mamawh phuhruk tura thurawn pe-in, sorkar laipui chuan sum an mamawh te chu a ngaihtuahsak zel dawn tih Chief Minister chu a hrilh bawk a ni.
Chief Minister Delhi zin hian Agriculture Secretary, Sanjay Agarwal pawh kawmin ei leh bara Mizoram a intodelh theihna tur leh mau hmanga mipuite dinhmun siam\hat dan tur chungchang a sawipui a, Secretary chuan project siama sorkar laipui pawmpui tura thawn turin Chief Minister chu thurawn a pe a ni.
Chief Minister, Pu Zoramthanga Delhi zin hi Myanmar Ambassador, Pu Moe Kyaw Ong-an tukin khan Mizoram House-ah a hmu a, thingpuite in dunin, ram pahnih mamawh an sawi dun a, chutah chuan ramria insumdawn tawnna tih changtlun dan tur te, zirna lam leh culture lama inpawh tawnna tur te an sawi dun a ni.
