Vawiina MNF Party Office-a thu a sawiah Pu Rama hian opposition ten budget a tlahniam deuh tih an sawi chu a dik tho laiin, Mizoramin thil dangah sum a hmuh tho bakah nikum budget ai chuan cheng vbc 22 chuangin a tam zawk a ni a ti a, Malsawmna dawn hun an thleng nia sawiin, Budget Session leh tun inkarah ringawt pawh Tourism-ah cheng vbc 100 chuang, Sports Department-ah cheng vbc 100 chuang leh UD & PA-ah cheng vbc 1800 chuang a lo thleng a, PHE-ah te pawh a thleng bawk a, a vai chuan cheng vbc 4000 chuang daih a lo thleng a ni a ti a, rawn thlen belh tur pawh a la tam tih sawiin Pathian malsawmna an dawn chu a ropui a ni a ti.
Finance changtu Pu Rama hian Budget chu dik taka kalpui chuan a daihzai hle a ni a ti a, Vai Party an nih ve lo a, neitu budget-in an kalpui a ni a ti.
Sorkar hmasa in a kalpui, NLUP ah chawfun sak ringawtin an thawh tur lam an ngaihtuahpui lo niin Pu Rama hian a sawi a, anni chuan a thawh tur lam an ngaihtuahpui tel nghal tih a sawi a, SEDP chu an mamawh ang zela kalpui tur a ni tih sawiin hna tak tak thawk turin an kalpui dawn tih a sawi a. Nakinah chuan sorkar hnathawk, a tak taka thawk turte pawh SEDP chu an la huam tir dawn tih a sawi.
