Mizoram Assembly Session \an nia Larsap, Prof. Jagdish Mukhi thusawi vawiina sawihona tlangkawma thu sawiin House Leader, Pu Zoramthanga chuan sorkarin Household Registration siam a tum member ten \ha an ti tlang chu lawmawm a tih thu a sawi a, Mizoram \hat leh nawmzia hretu Mizoram hual vela chengte hian Mizorama awmte an chimral loh nan invenna tur a, Household Registration siam hi thil \ul tak leh sorkar thil ngaihpawimawh niin a sawi a ni.
Pu Zoramthanga chuan sorkar flagship programme SEDP kalpui tum dan chu tawngpawnga sum sem lam ni lovin Cooperative Society kaltlanga chhungkaw mal tihhmasawnna tur project lam hawia hman a ni dawn niin a sawi a, chhungkaw khat tan cheng nuai thum aia tam hman a \ul hun pawh a awm dawn niin a sawi a ni.
Aizawl khawpui laili lai a\anga Assam Rifles sawn chhuah tur chungchanga member-te thusawi chhangin Pu Zoramthanga chuan Assam Rifles Battalion Hqrs. hi tuna an awmna a\ang hian mumal taka sawn chhuaha Zokhawsanga an awmna tur thar siamah kim taka bengluh tum a ni dawn niin a sawi a ni. Pu Zoramthanga chuan Opposition Party member \henkhatin sorkar tan hmathlir thui tak neih a \ul thu an sawi te chungte chu tihpuitlin theih ngei ni se an duh thu an sawi te chhangin thil tum tihpuitlin nan hunreilote duh chi te, kum li kum nga leh kum tam zawk mamawh chi te a awm tih sawiin, Aizawl khawpui huam chhunga traffic jam tih tlemna tura hmalak dan tur an rawt chi hrang hrang te a tarlang a, an sorkar hmasaka tihfuh loh \henkhat an neih a\anga thil tam tak an zir thu te sawiin tun \umah chuan parking system siamin hmalak hmasak tum a ni ang a, chuta tan chuan parking house siam phal a ni ang a, he rawtna siam hi \ha tia chhangtu an awm nual tawh niin a sawi a ni. Bawngkawna fly over leh Vaivakawna fly over cheng vbc za vel senga siam tum te, Chaltlanga Inter State Bus Terminal cheng vbc 150 vel senga siam tum te chu bawhzui zel a nih thu leh sorkar laipuia thuneitute a\angin pawmpui lailawkna, \’In principle approval’ hmuh a nih tawh thu te a sawi bawk. Pu Zoramthanga chuan MNF sorkarin bul a \an dek dek a, kum 2018-19 financial year tawp lam a lo ni a, chumi bakah inthlanpui puan hnan an ni a, chuvangin tun dinhmunah hmalakna a chak thei lo niin a sawi a, zirna siam \ha tura hmalakna leh zirtirtu nasa taka sawn buai lova a khaw mi te laa, school hrang hranga zirtirtu indaih zawka dah dan ngaihtuah mek a nih thu te, sorkar deptt. tam takah hnathawktu hniam lam lak zui a nih loh vanga hnaruak hnawhkhat tur tam tak awm tawh te chu hnawhkhat thuai tura hmalak tum a ni tih a sawi bawk.
Pu Zoramthanga chuan Mizorama Cancer tam lutuk chu a manganthlak a, hei hi rannung thahna hlo leh damdawi a\anga siam lei tih \hatna hlo hman tam vang te, \henawm state thlai chin, enga chawm nge tih pawh hriat loh tam tak lakluh anih vang te a ni thei ang em tih ngaihtuahna a awm a ni a ti a, a chhan zawn chhuaha engtinnge pumpelh theih anih ang tih chu sorkar ngaihpawimawh hmasak tur zinga mi a ni a ti.
Assembly rorel inkhawmah hian Larsap thusawi sawihona neih zawhah Speaker, Pu Lalrinliana Sailo chuan House chhungah vote a la a, member te chuan Larsap thusawi chu lungrual takin an pawm tlang ta a ni.
