Club tantute leh Team Official-te chet dan chungchang vangin AIFF-in Aizawl FC cheng nuai 3 chawi turin ti

0
488
views

Kumin January ni 25-a Aizawl FC leh Kolkata Club, Mohun Bagan-in Mualpuia Rajiv Gandhi Stadium-a I-League Match an khelh tuma Aizawl FC tantute leh Team Official-te chetdan chungchang vangin Aizawl FC chu cheng nuai 3 chawi tura tih a ni. He thil thleng chungchangah hian Aizawl FC President, Pu Robert Romawia Royte chu nimin khan Kolkotta Bengal Club-a AIFF Disciplinary Committee hmaah a inlan a. He thil thleng chungchang hi ngun taka ngaihtuah a nih hnuah Aizawl FC chu cheng nuai 3 chawi tura tih a ni a, Team Manager, Pu Hmingthana Zadeng pawh Match 4 chhung inkhel enkawl thei lo tura hrem a ni bawk. AIFF Disciplinary Committee hmaa a inlan zawha thuthar lakhawmtute a kawmnaah Aizawl FC President, Pu Robert Romawia Royte chuan, All India Football Federation-in Aizawl FC sum a bat cheng nuai 57 a pek tlak hunah tuna chawi tura an tih cheng nuai 3 chu an pek ve nghal tur thu a sawi a ni.