CM-in Aizawl District Disaster Management Authority Application tlangzarh

0
524
views

Khawrel chhiatna thlen thulha vanduaina tawkten chhanchhuaktu awlsam zawka an koh theihna tur Aizawl District Disaster Management Authority Application chu vawiin khan Chief Minister, Pu Lal Thanhawla’n a tlangzarh. Hemi puala inkhawm CM Conference Hall-a neihah thusawiin Chief Minister chuan, Mizoram chu lirnghing na tak thlen theihna hmun a nih bakah leimin leh tuilian vanga harsatna thlen fona a ni tih sawiin, hetiang harsatna a thlen thulha nep zawka tuar theihna turin inbuatsaih lawkna neih a tul a ni a ti a, Aizawl District Disaster Management Authority-in chhiatna lo thlen thulh a chhanchhuaktu koh zung zung theih na tur Mobile Application a siam chu mipuite tan a tangkai hle dawn niin a sawi a ni. Pu Lal Thanhawla chuan, vanduaina tawkten tanpuina an dawn theihna tura sorkar laipui atanga endiktu lo kalten an hmuh theih turin thlalak leh Video lo neih lawk a tul thu te, District tin DC te chu hriattir an ni tawh niin a sawi bawk. He Aizawl District Disaster Management Authority Application chungchang sawifiahtu Aizawl Bawrhsap, Pu Kannan Gopinathan chuan Smartphone atangin Google Playstore-ah Aizawl District Disaster Management Authority tih chu a hmuh theih niin a sawi a, he Application neite chuan My Zonal Officer tih hmetin anmahni bialtu Officer-te biakna tur phone number an hmuh thei niin a sawi a ni. He inkhawm Addl. DC, Pu John LT Sanga’n a kaihruai a, hetah hian DM&R Secretary, Pu Zothankhuma leh Senior officer dangte an tel a ni.