New Delhi-a sorkar laipui hruaitute dawra zin mek, Chief Minister, Pu Lal Thanhawla chuan vawiin khan Union Home Minister, Pu Raj Nath Singh leh Defence Minister, Pi Nirmala Sitharaman te Mizoram mamawh chungchangah a hmu. Union Home Minister, Pu Raj Nath Singh hi a office-ah hmu-in Myanmar atanga Rohingya mi raltlante vanga Mizoramin harsatna a tawh theih dan te, Arakan hel pawl leh Myanmar sipaite inkara inbeihna thleng thin vanga Zoram chhim lama boruak ralmuang lo chungchangte, Myanmar ram chhunga Zohnahthlak awm chungchangte Chief Secretary, Pu Lalmalsawma pension-a a chhuah huna amah thlaktu Chief Secretary thar tur chungchangte a sawipui a ni. Defence Minister, Pi Nirmala Sitharaman pawh a Pisaah hmu-in, Mizoram awmna chu India ram himna atana hmun pawimawh leh ngaihpawimawh ngai a nih dan te, Defence Ministry hnuaia BRO-in kawng a siam mek dan te leh Border Road Organization hnathawh tih chak a tul thu te a hrilh a ni.
